نئی دہلی، 17 اگست (ہ س)۔ عام آدمی پارٹی (اے اے پی) کے سینئر لیڈر اور میونسپل کارپوریشن آف دہلی (ایم سی ڈی) میں قائد حزب اختلاف، انکش نارنگ نے پیر کو پانی کے وزیر پرویش صاحب ورما اور دہلی جل بورڈ (ڈی جے بی) کے سی ای او کو مغربی پٹیل نگر کے رنجیت نگر وارڈ 87 میں سیور اوور فلو، کھلے گٹر اور پانی جمع ہونے کے بارے میں خط لکھا ہے۔ انہوں نے پانی کے وزیر اور ڈی جے بی کے سی ای او سے مطالبہ کیا کہ فوری طور پر سیوروں کی صفائی کی جائے، کھلے گٹروں کو بند کیا جائے اور پانی کی نکاسی کے مسئلے کا مستقل حل نکالا جائے۔ انہوں نے یہ بھی مطالبہ کیا کہ غفلت برتنے والے دہلی جل بورڈ کے اہلکاروں کو جوابدہ بنایا جائے اور ان کے خلاف سخت کارروائی کی جائے۔
انکش نارنگ نے خط میں کہا کہ ویسٹ پٹیل نگر اور رنجیت نگر وارڈ نمبر 87 کے مکینوں کو سیوریج کے سنگین مسائل کا سامنا ہے۔ یہ علاقہ طویل عرصے سے سیور اوورفلو، کھلے گٹروں، سیوریج کے پھیلاو¿ اور پانی بھر جانے کا شکار ہے۔ اس سے مقامی باشندوں کو کافی مشکلات کا سامنا کرنا پڑ رہا ہے اور علاقے میں گندگی اور بدبو نے صحت کو سنگین خطرات لاحق کر دیے ہیں۔
انہوں نے خط میں کہا کہ علاقہ مکینوں نے متعلقہ محکمے اور اس کے ملازمین کو متعدد شکایات درج کرائی ہیں لیکن اس کے باوجود متعلقہ عملہ اس مسئلے کے حل کے لیے مطلوبہ کارروائی نہیں کر رہا۔ انہوں نے مزید کہا کہ شکایات کو مسلسل نظر انداز کرنا انتہائی افسوسناک اور تشویشناک ہے۔
انکش نارنگ نے مطالبہ کیا کہ علاقے میں سیوریج اوور فلو کا مسئلہ فوری حل کیا جائے۔ تمام کھلے گٹروں کو ترجیحی بنیادوں پر بند اور محفوظ کیا جائے۔ زیر آب علاقوں سے گندے پانی کو فوری طور پر نکالا جائے۔ سیوریج لائنوں کو اچھی طرح صاف کیا جائے اور ضرورت کے مطابق مرمت کی جائے۔ انہوں نے ان افسران اور ملازمین کے احتساب کا بھی مطالبہ کیا جو پہلے درج کی گئی شکایات پر کارروائی کرنے میں ناکام رہے۔
نارنگ نے کہا کہ علاقے کا معائنہ کر کے مسئلے کے مستقل حل کو یقینی بنایا جائے اور اس بات کو یقینی بنانے کے لیے مناسب انتظامات کیے جائیں کہ آئندہ ایسا مسئلہ دوبارہ پیدا نہ ہو۔
انکش نارنگ نے پانی کے وزیر اور ڈی جے بی کے سی ای او سے توقع ظاہر کی ہے کہ وہ عوامی مفاد میں اس معاملے کو ترجیح دیں گے اور فوری ضروری کارروائی کو یقینی بنائیں گے اور متعلقہ حکام سے کی گئی کارروائی کی رپورٹ بھی حاصل کریں گے۔
ہندوستھا ن سماچار
ہندوستان سماچار / محمد شہزاد
