36 اسکیموں کے موثر تال میل سے جولائی میں پہلی پوزیشن حاصل کی، ڈنڈوری کے کودوکٹکی مصنوعات کو جی آئی ٹیگ ملنے سے قومی شناخت حاصل ہوئی

بھوپال، 17 اگست (ہ س)۔

مدھیہ پردیش کے ڈنڈوری ضلع نے وزیر اعظم دھن دھانیہ زرعی اسکیم کے نفاذ میں ملک کے منتخب 100 اضلاع میں جولائی کے مہینے میں پہلی پوزیشن حاصل کی ہے۔ یہ کامیابی ضلع میں مختلف محکموں کی جانب سے چلائی جانے والی 36 اسکیموں کے بہتر نفاذ اور موثر تال میل کے باعث حاصل ہوئی ہے۔

جن رابطہ افسر پشپ راج سنگھ نے پیر کو یہ معلومات دیتے ہوئے بتایا کہ وزیر اعظم دھن دھانیہ زرعی اسکیم کے ذریعے زرعی پیداوار میں اضافہ، کسانوں کی آمدنی بڑھانے، آبپاشی اور زرعی بنیادی ڈھانچے کو مضبوط بنانے اور جدید زرعی تکنیکوں کو فروغ دینے پر زور دیا جا رہا ہے۔ اسی کا نتیجہ ہے کہ اسکیم کے نفاذ میں ضلع نے ملک میں پہلی پوزیشن حاصل کی ہے۔

ڈنڈوری کی کلکٹر انجو پون بھدوریہ نے وزیر اعظم دھن دھانیہ زرعی اسکیم کے نفاذ میں ملک کے 100 منتخب اضلاع میں پہلی پوزیشن حاصل کرنے پر متعلقہ محکموں کے افسران و ملازمین اور ضلع کے کسانوں کو مبارکباد دی ہے۔ ساتھ ہی انہوں نے آئندہ بھی اسی طرح موثر محکمانہ تال میل، عوامی شراکت داری اور مسلسل نگرانی کے ساتھ کام کرتے ہوئے زیادہ سے زیادہ کسانوں اور دیہی خاندانوں کو حکومت کی اسکیموں کا فائدہ پہنچانے کی اپیل کی ہے۔

زرعی اور ملیٹ کی پیداوار کو مل رہا فروغ

جن رابطہ افسر کے مطابق ڈنڈوری ضلع کی معیشت بنیادی طور پر زراعت، جنگلاتی پیداوار اور دیہی روزگار پر منحصر ہے۔ ضلع میں قدرتی اور نامیاتی کاشتکاری کے ساتھ شری اَنّ (ملیٹس) کی پیداوار کو خصوصی فروغ دیا جا رہا ہے۔ ضلع میں 34 ہزار 700 ہیکٹر رقبے پر کودو کٹکی کی کاشت کی جا رہی ہے، جس سے 52 ہزار 282 کسان خاندان اور 14 کسان پروڈیوسر تنظیمیں براہِ راست وابستہ ہیں۔ ضلع کی روایتی کودو کٹکی مصنوعات کو جی آئی ٹیگ ملنے سے انہیں قومی سطح پر شناخت حاصل ہوئی ہے۔

ہندوستھان سماچار

ہندوستان سماچار / عطاءاللہ