امرتسر، 15 اگست (ہ س)۔

ملک بھر کی طرح امرتسر کی اٹاری-واگھہ سرحد پر بھی 80واں یوم آزادی پورے فخر، جوش اور حب الوطنی کے جذبے کے ساتھ منایا گیا۔ بارڈر سکیورٹی فورس (بی ایس ایف) کی جانب سے منعقدہ خصوصی تقریب میں بی ایس ایف کے ڈی آئی جی ایس ایس چندیل مہمان خصوصی کے طور پر شریک ہوئے۔ اس دوران سرحد پر تعینات جوانوں اور افسران میں خاصا جوش و خروش دیکھا گیا۔

ڈی آئی جی ایس ایس چندیل نے ملک کے عوام کو یوم آزادی کی دلی مبارکباد دیتے ہوئے کہا کہ بی ایس ایف کے جوان ملک کی سلامتی کے لیے دن رات سرحدوں پر پوری وفاداری اور لگن کے ساتھ ڈٹے ہوئے ہیں۔ انہوں نے کہا کہ ملک کی سرحدوں کی حفاظت کرنا بی ایس ایف کے لیے باعث فخر ہے اور جوان ہر چیلنج کا مقابلہ کرنے کے لیے ہمیشہ تیار رہتے ہیں۔

انہوں نے سرحد پر بی ایس ایف کی جانب سے ادا کیے جا رہے کردار کا ذکر کرتے ہوئے کہا کہ جوانوں نے دشمن کی سرگرمیوں کا مضبوطی سے مقابلہ کیا ہے۔ انہوں نے بتایا کہ بی ایس ایف نے ڈرونز کو مار گرائے جانے کے ساتھ ساتھ بڑی مقدار میں منشیات اور ہتھیار بھی برآمد کیے ہیں۔

اس موقع پر سب انسپکٹر سے انسپکٹر کے عہدے پر ترقی پانے والے بی ایس ایف کے دو جوانوں کو اعزاز سے نوازا گیا۔ ڈی آئی جی نے کہا کہ یہ اعزاز جوانوں کی محنت اور لگن کی علامت ہے۔

یوم آزادی کے موقع پر ڈی آئی جی ایس ایس چندیل نے بی ایس ایف کے جوانوں کو لڈو کھلا کر ان کا منہ میٹھا کرایا۔ اس دوران ”بھارت ماتا کی جے“ کے نعروں سے سرحد کا ماحول حب الوطنی کے جذبے سے سرشار ہو گیا۔ تقریب میں ثقافتی پروگرام بھی پیش کیے گئے۔ ڈی آئی جی نے قومی گیت کے 150 سال مکمل ہونے پر بھی ملک کے عوام کو مبارکباد دی۔

ہندوستھان سماچار

ہندوستان سماچار / عطاءاللہ