کاٹھمنڈو، 14 اگست (ہ س)۔

نیپال کے رولپا ضلع کے تھباڑ گاؤں پالیکا، اوا کوٹل بار میں ہوئی لینڈ سلائیڈنگ میں اب تک 10 افراد ہلاک ہو چکے ہیں۔ پولیس کے مطابق، ان میں سے پانچ لاشیں جائے حادثہ سے برآمد کی گئی ہیں، جبکہ پانچ دیگر لاشیں سیلاب کے تیز بہاؤ کے باعث پیوتھان پہنچ گئی تھیں۔ ہلاک ہونے والوں میں 5 سالہ بچے سے لے کر 85 سالہ بزرگ تک شامل ہیں۔

کوٹل بار گاؤں کے بالائی حصے میں بڑے پیمانے پر لینڈ سلائیڈنگ ہوئی ہے۔ ملبے کی زد میں آنے سے گاؤں کے 11 مکانات دب گئے۔ بتایا گیا ہے کہ اس حادثے میں بڑے پیمانے پر جانی نقصان ہوا ہے۔ تین افراد اب بھی لاپتہ بتائے جا رہے ہیں اور ان کی تلاش جاری ہے۔ ملبے کی زد میں آنے سے 22 سالہ ہمال پون مگر اور 25 سالہ سنجے گھرتی زخمی ہو گئے۔ انہی دونوں نے رات کے وقت پولیس کے ایمرجنسی نمبر 100 پر فون کر کے واقعے کی اطلاع دی تھی۔ دونوں کا بٹول میں علاج جاری ہے۔

جائے حادثہ سے 18 سالہ شانتی پون مگر، 60 سالہ کمل بہادر پون مگر، 80 سالہ منرکھی پون مگر، 75 سالہ ڈل بہادر پون مگر اور 85 سالہ ہست کلا روکا مگر کی لاشیں برآمد کی گئی ہیں۔ ضلع پولیس دفتر کے اطلاعاتی افسر اور پولیس انسپکٹر کرشن شریشٹھ کے مطابق، رولپا کی لنگری ندی اور پیوتھان کی ماڈی ندی کے مختلف مقامات سے بھی پانچ افراد کی لاشیں برآمد کی گئی ہیں۔

پیوتھان میں ملنے والی لاشوں کی شناخت 38 سالہ جون کماری پون مگر، 5 سالہ اشوک پون مگر، 80 سالہ بل بہادر پون مگر، 66 سالہ منی پون مگر اور 34 سالہ مہندر گھرتی کے طور پر ہوئی ہے۔ پولیس انسپکٹر شریشٹھ نے بتایا کہ 9 مکانات، ایک دکان، دو گوٹھ (مویشی خانے)اور ایک چرچ مکمل طور پر ملبے میں دب گئے ہیں۔ جائے حادثہ پر راحت اور بچاؤ کا آپریشن جاری ہے۔

ہندوستھان سماچار

ہندوستان سماچار / Mohammad Khan