واشنگٹن، 14 اگست(ہ س)۔ ایران جنگ کے دوران امریکا کو اپنے جدید ایم کیو9- ریپر ڈرونز کے بڑے نقصان کا سامنا کرنا پڑا ہے۔ امریکی اخبار واشنگٹن پوسٹ کی رپورٹ کے مطابق جنگ کے دوران کم از کم 45 ایم کیو9- ریپر ڈرونز تباہ یا مار گرائے گئے، جن کی مجموعی مالیت ایک ارب 30 کروڑ ڈالر سے زائد بتائی گئی ہے۔

رپورٹ میں معاملے سے واقف تین امریکی عہدیداروں کے حوالے سے بتایا گیا ہے کہ تباہ ہونے والے ڈرونز کی تعداد ایران کے ساتھ جنگ شروع ہونے سے قبل امریکی فوج کے پاس موجود ایم کیو-9 ریپر ڈرونز کے ذخیرے کا تقریباً 25 فیصد ہے۔امریکی فوج کے پاس اب تقریباً 145 ایم کیو-9 ریپر ڈرونز باقی رہ گئے ہیں۔

امریکی میڈیا رپورٹس کے مطابق ایک ایم کیو-9 ریپر ڈرون کی قیمت اس میں نصب جدید سینسرز، مواصلاتی نظام اور ہتھیاروں کے لحاظ سے تقریباً 3 کروڑ سے 5 کروڑ ڈالر تک ہو سکتی ہے۔ اس حساب سے 45 ڈرونز کے نقصان کی مجموعی مالیت ایک ارب 30 کروڑ ڈالر سے تجاوز کرتی ہے۔رپورٹ کے مطابق ایران کے ساتھ جنگ کے دوران امریکی فوج نے ایم کیو-9 ریپر ڈرونز کو نگرانی، انٹیلی جنس جمع کرنے اور حملہ آور کارروائیوں کے لیے بڑے پیمانے پر استعمال کیا۔ آبنائے ہرمز کے اطراف بھی ان ڈرونز کی سرگرمیاں جاری رہیں۔ایم کیو-9 ریپر ایک طویل فاصلے تک پرواز کرنے والا بغیر پائلٹ طیارہ ہے، جسے نگرانی کے ساتھ ساتھ مختلف فوجی کارروائیوں میں استعمال کیا جاتا ہے۔ جنگ کے دوران بڑی تعداد میں ان ڈرونز کا ضائع ہونا امریکی فضائی اور نگرانی کی صلاحیتوں پر پڑنے والے دباؤ کو ظاہر کرتا ہے۔

ہندوستھان سماچار

ہندوستان سماچار / Mohammad Khan