بالی ووڈ سپر اسٹار سلمان خان اور سنجے دت جلد ہی انٹرنیشنل فلم ’7 ڈاگز‘ میں ایک ساتھ نظر آنے والے ہیں۔ فلم کو لے کر پہلے سے ہی ناظرین کے درمیان زبردست جوش و خروش ہے اور اب سلمان خان نے اپنے سوشل میڈیا اکاونٹ پر اس کا آفیشل ٹریلر شیئر کر کے مداحوں کا جوش مزید بڑھا دیا ہے۔ ٹریلر میں سلمان اور سنجے دت کا شاندار انداز دیکھنے کو مل رہا ہے۔ دونوں فنکار زبردست ایکشن کرتے نظر آ رہے ہیں، جسے لے کر سوشل میڈیا پر مداحوں کے ردِعمل بھی سامنے آ رہے ہیں۔

ملٹی اسٹارر فلم ’7 ڈاگز‘ میں سلمان خان اور سنجے دت کے علاوہ احمد ایز اور کریم عبد العزیز اہم کرداروں میں ہیں۔ فلم کی ہدایت کاری عادل العربی اور بلال فلاح نے کی ہے، جو ’بیڈ بوائز فار لائف‘ اور ’بیڈ بوائز: رائڈ اور ڈائی‘ جیسی فلموں کے لیے جانے جاتے ہیں۔ فلم کو سیلا اسٹوڈیوز نے جنرل انٹرٹینمنٹ اتھارٹی اور ریاض سیزن کے ساتھ مل کر پروڈیوس کیا ہے۔ ٹریلر میں فلم کی کہانی، ایکشن اور فنکاروں کی موجودگی اسے خاص بناتی نظر آ رہی ہے۔

ٹریلر کے ساتھ ہی ہندوستان میں فلم کی ریلیز کی تاریخ بھی سامنے آ گئی ہے۔ سلمان خان اور سنجے دت کی ’7 ڈاگز‘ ہندوستان میں 21 اگست 2026 کو سینما گھروں میں ریلیز ہوگی۔ دونوں ستاروں کی جوڑی اور انٹرنیشنل پروڈکشن سے جڑی اس فلم کو لے کر ہندوستانی ناظرین میں بھی کافی تجسس ہے۔ اب یہ دیکھنا دلچسپ ہوگا کہ فلم میں سلمان خان اور سنجے دت کس طرح کے کردار ادا کرتے ہیں اور بڑے پردے پر ان کی جوڑی ناظرین پر کتنا اثر چھوڑتی ہے۔

ہندوستھان سماچار

---------------

ہندوستان سماچار / انظر حسن