نئی دہلی، 13 اگست (ہ س)۔ گھریلو شیئر بازار میں آج ابتدائی کاروبار کے دوران دباو نظر آ رہا ہے۔ آج کے کاروبار کی ملی جلی شروعات ہوئی تھی۔ سینسیکس اضافے کے ساتھ سبز نشان میں کھلا تھا، جبکہ نفٹی نے فلیٹ سطح پر معمولی گراوٹ کے ساتھ کاروبار کی شروعات کی تھی۔ بازار کھلنے کے بعد فروخت کا دباو بن گیا، جس کی وجہ سے ان دونوں انڈیکس کی کمزوری بڑھتی چلی گئی۔ حالانکہ پہلے 20 منٹ کے کاروبار کے بعد خریداروں نے خریداری کا زور بنا دیا، جس سے ان دونوں انڈیکس کی حالت میں کچھ سدھار بھی ہوا۔ خریداری کی حمایت ملنے کے باوجود یہ دونوں انڈیکس مسلسل سرخ نشان میں ہی کاروبار کرتے رہے۔ پہلے ایک گھنٹے کا کاروبار ہونے کے بعد سینسیکس 0.23 فیصد اور نفٹی 0.39 فیصد کی کمزوری کے ساتھ کاروبار کر رہے تھے۔بامبے اسٹاک ایکسچینج (بی ایس ای) کا سینسیکس آج 145.56 پوائنٹس یعنی 0.19 فیصد کی مضبوطی کے ساتھ 78,111.91 پوائنٹس کی سطح پر کھلا۔ کاروبار کی شروعات ہوتے ہی یہ انڈیکس پہلے منٹ میں ہی معمولی اضافے کے ساتھ 78,119.39 پوائنٹس تک پہنچ گیا۔ اس کے بعد بازار میں فروخت کا دباو بن گیا، جس کی وجہ سے سینسیکس گرتا چلا گیا۔ شیئروں کی لگاتار ہو رہی فروخت کے سبب پہلے 20 منٹ کے کاروبار میں ہی یہ انڈیکس اوپننگ لیول سے 400 پوائنٹس سے زیادہ گر کر سرخ نشان میں 77,709.63 پوائنٹس کی سطح تک آ گیا۔اس کے بعد خریداروں نے مورچہ سنبھالا اور خریداری شروع کر دی۔ خریداری کی حمایت سے سینسیکس کی چال میں کچھ سدھار بھی ہوا۔ حالانکہ بازار میں فروخت کا دباو اتنا زیادہ تھا کہ یہ انڈیکس مسلسل سرخ نشان میں ہی برقرار رہا۔ بازار میں مسلسل جاری خرید و فروخت کے درمیان پہلے ایک گھنٹے کا کاروبار ہونے کے بعد صبح 10.15 بجے سینسیکس 178.67 پوائنٹس گر کر 77,787.68 پوائنٹس کی سطح پر کاروبار کر رہا تھا۔سینسیکس کے برعکس این ایس ای کے نفٹی نے آج فلیٹ سطح پر معمولی کمزوری کے ساتھ کاروبار کی شروعات کی۔ اس انڈیکس نے 4.35 پوائنٹس یعنی 0.018 فیصد گر کر 24,431.60 پوائنٹس کی سطح سے کاروبار کرنا شروع کیا۔ بازار کھلتے ہی فروخت کا دباو بننے کے سبب نفٹی اوپننگ لیول سے 110 پوائنٹس سے زیادہ گر کر 24,316.30 پوائنٹس کی سطح تک پہنچ گیا۔اس کے بعد خریداروں نے خریداری شروع کر کے بازار کو سہارا دینے کی کوشش کی، جس سے اس انڈیکس کی چال میں کچھ سدھار بھی ہوا۔ حالانکہ بازار میں منفی رجحان اس قدر حاوی تھا کہ خریداروں کی کوشش کے باوجود یہ انڈیکس ریکور کر کے سبز نشان میں نہیں پہنچ سکا۔ بازار میں مسلسل جاری خرید و فروخت کے درمیان ابتدائی ایک گھنٹے کا کاروبار ہونے کے بعد صبح 10.15 بجے نفٹی 94.40 پوائنٹس کی گراوٹ کے ساتھ 24,341.55 پوائنٹس کی سطح پر کاروبار کر رہا تھا۔پہلے ایک گھنٹے کا کاروبار ہونے کے بعد شیئر بازار کی سرکردہ کمپنیوں میں سے ٹیک مہندرا، شری رام فنانس، اپولو ہاسپٹل، جیو فنانشل اور میکس ہیلتھ کیئر کے شیئر 1.32 فیصد سے لے کر 0.66 فیصد کی مضبوطی کے ساتھ کاروبار کر رہے تھے۔ دوسری جانب، گراسم انڈسٹریز، ہنڈالکو انڈسٹریز، الٹرا ٹیک سیمنٹ، رلائنس انڈسٹریز اور ٹائٹن کمپنی کے شیئر 2.28 فیصد سے لے کر 1.35 فیصد کی کمزوری کے ساتھ کاروبار کرتے ہوئے نظر آ رہے تھے۔ابھی تک کے کاروبار میں شیئر بازار میں 2,633 شیئروں میں ایکٹیو ٹریڈنگ ہو رہی تھی۔ ان میں سے 1,499 شیئر منافع کما کر سبز نشان میں کاروبار کر رہے تھے، جبکہ 1,134 شیئر نقصان اٹھا کر سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 11 شیئر خریداری کی حمایت سے سبز نشان میں برقرار تھے۔ دوسری جانب 19 شیئر فروخت کے دباو میں سرخ نشان میں کاروبار کر رہے تھے۔ جبکہ نفٹی میں شامل 50 شیئروں میں سے 16 شیئر سبز نشان میں اور 34 شیئر سرخ نشان میں کاروبار کرتے نظر آ رہے تھے۔ہندوستھان سماچار

---------------

ہندوستان سماچار / انظر حسن