واشنگٹن، 13 اگست (ہ س)۔ وائٹ ہاؤس کی پریس سیکریٹری کیرولین لیویٹ بہت جلد اپنا عہدہ چھوڑ دیں گی۔ انہیں وائٹ ہاؤس اور صدر ڈونالڈ ٹرمپ کی سب سے قریبی عہدیداروں میں شمار کیا جاتا ہے۔ ٹرمپ نے لیویٹ کے فیصلے کا خیرمقدم کیا ہے۔ صدر نے بدھ کو اپنے ٹروتھ سوشل اکاؤنٹ پر اطلاع دی کہ کیرولین لیویٹ رواں ماہ کے آخر تک وائٹ ہاؤس سے رخصت ہو جائیں گی۔ انہوں نے لکھا، ’’وائٹ ہاؤس کی پریس سیکریٹری کیرولین لیویٹ میری سب سے قابل اعتماد ساتھیوں میں سے ایک ہیں۔ وہ ماہ کے آخر میں اپنا عہدہ چھوڑ دیں گی۔ اس کے بعد وہ اپنا زیادہ سے زیادہ وقت اپنے خاندان اور اپنے پیارے چھوٹے بچوں کے ساتھ گزاریں گی۔‘‘

صدر ٹرمپ نے لکھا، ’’میں لیویٹ کے اس فیصلے کا مکمل احترام کرتا ہوں۔ کیرولین اب میرے بیرونی مشیروں میں سب سے اہم ہوں گی اور ریپبلکن پارٹی میں ایک بااثر آواز بنیں گی۔ وہ وسط مدتی انتخابات میں تعاون کریں گی۔ کیرولین نے وائٹ ہاؤس میں شاندار قیادت کی ہے۔ انہوں نے 2018 سے انصاف، آزادی اور خود مختاری کے لیے جدوجہد کی ہے، جس میں 2024 کی تاریخی انتخابی مہم بھی شامل ہے۔ کیرولین کو وائٹ ہاؤس کی تاریخ کی بہترین پریس سیکریٹریز میں شمار کیا جائے گا۔ اس کے لیے میں ان کا شکریہ ادا کرتا ہوں۔‘‘

اس پیش رفت پر سی این این کی رپورٹ میں کہا گیا ہے کہ وسط مدتی انتخابات میں اب تین ماہ سے بھی کم وقت باقی ہے۔ ایسے وقت میں وائٹ ہاؤس سے صدر کے سب سے قریبی ساتھیوں میں سے ایک کا جانا ایک بڑی تبدیلی ہوگی۔ یہ تبدیلی ٹرمپ کے لیے ایک مشکل وقت میں ہو رہی ہے۔ ایران کے ساتھ جاری جنگ اور گیس کی بڑھتی ہوئی قیمتوں کے درمیان ان کی مقبولیت کی شرح کم ہوئی ہے اور زیادہ تر امریکیوں کا خیال ہے کہ انہوں نے ملک کے اہم مسائل پر مناسب توجہ نہیں دی۔ 28 سالہ لیویٹ وائٹ ہاؤس کی سب سے کم عمر پریس سیکریٹری بن کر تاریخ رقم کر چکی ہیں۔

ٹرمپ کے پہلے دورِ صدارت کے مقابلے میں دوسرے دور میں لیویٹ سب سے طاقتور عہدیداروں میں شامل ہو کر ابھریں۔ انہوں نے صدر اور ان کی پالیسیوں کا مضبوطی سے دفاع کیا۔ مشکل سوالات کرنے والے صحافیوں سے ان کا سامنا ضرور ہوا، لیکن انہوں نے دوستانہ تعلقات کبھی ختم نہیں کیے۔ مائیکروفون کے پیچھے اور سوشل میڈیا پر انہوں نے خود کو ایک اچھی بیوی اور ملازمت پیشہ ماں کے طور پر پیش کیا۔ وہ اپنے چھوٹے بیٹے نیکو کو ایئر فورس ون اور اوول آفس بھی لے جاتی رہی ہیں۔ وائٹ ہاؤس میں ایسٹر ایگ رول اور ہالووین تقریبات کے دوران وہ اپنے شوہر کے ساتھ تصاویر بھی کھنچواتی رہی ہیں۔ وہ خود ایپل پائی بناتی رہیں اور اپنی نومولود بیٹی ویویانا کے ساتھ محبت بھرے لمحات گزارتی رہیں۔

ٹرمپ کی پوسٹ کے بعد لیویٹ نے سوشل میڈیا پر لکھا، ’’حقیقت یہ ہے کہ بیٹی کی پیدائش کے بعد وائٹ ہاؤس واپس آنے پر مجھے دل سے محسوس ہوا کہ مجھے اب ایک بہترین ماں بننے کے لیے کچھ سوچنا ہوگا۔ وائٹ ہاؤس چھوڑنے کے فیصلے سے میں خوش بھی ہوں اور افسردہ بھی۔‘‘

قابل ذکر ہے کہ یکم مئی کو بیٹی کی پیدائش کے بعد لیویٹ نے وائٹ ہاؤس سے تقریباً ایک ماہ کی چھٹی لی تھی۔ جب جولائی 2024 میں لیویٹ کے پہلے بچے کی پیدائش ہوئی تھی تو انہوں نے صرف چار دن کی چھٹی لی تھی۔

ٹرمپ کے پہلے دورِ صدارت کے بعد لیویٹ نے اپنے آبائی ریاست نیو ہیمپشائر سے کانگریس کا عام انتخاب لڑا، لیکن انہیں شکست کا سامنا کرنا پڑا۔ اس کے بعد 2024 کی صدارتی انتخابی مہم کے دوران وہ ایک قابل اعتماد چہرہ بن کر ابھریں۔ اب جیسے جیسے 2026 کے وسط مدتی انتخابات کی سرگرمیاں بڑھ رہی ہیں، لیویٹ باہر سے ایک اہم پیغام رساں کے طور پر سامنے آ سکتی ہیں۔ انہوں نے بدھ کو یہ بھی لکھا، ’’میں ہمیشہ ریپبلکن پارٹی کی حمایت کرتی رہوں گی۔‘‘

دوسری جانب وائٹ ہاؤس میں ابھی یہ واضح نہیں ہو سکا ہے کہ لیویٹ کی جگہ کون لے گا۔

ہندوستھان سماچار

---------------

ہندوستان سماچار / عبدالواحد