کاٹھمنڈو، 12 اگست (ہ س)۔ نیپال کی حکمران راشٹریہ سوتنتر پارٹی (آر ایس پی) کے چیئرمین روی لامیچھانے اگست کے آخری ہفتے میں چین کا آٹھ روزہ دورہ کرنے والے ہیں۔ ان کے چین کے دورے کی تاریخ 23 سے 30 اگست مقرر کی گئی ہے۔

پارٹی کے جنرل سکریٹری وپن آچاریہ کے مطابق یہ دورہ چینی کمیونسٹ پارٹی کی دعوت پر ہوگا۔ اس سے قبل آر ایس پی کے اقتدار میں آنے کے بعد ہندوستان کی حکمران بھارتیہ جنتا پارٹی (بی جے پی) کی دعوت پر لامیچھانے ہندوستان کے پانچ روزہ دورے پر گئے تھے۔ چین کا یہ ان کا پہلا دورہ ہوگا۔

تاہم، لامیچھانے کے چینی صدر اور چینی کمیونسٹ پارٹی کے جنرل سکریٹری شی جن پنگ سے ملاقات کرنے کا امکان نہیں ہے۔ ان کے ابتدائی سفر نامے میں شی کے ساتھ ملاقات شامل نہیں ہے۔ روی لامیچھانے کی جانب سے شی سے ملاقات کا انتظام کرنے کی کافی کوشش کی گئی، لیکن آخری لمحات میں بھی ممکن نہیں ہوسکا۔

کاٹھمنڈو میں چینی سفارت خانے کے مطابق چین کے پروٹوکول کے تحت صدر شی عام طور پر صرف سربراہان مملکت یا حکومت سے ملاقات کرتے ہیں۔ اس وجہ سے، لامیچھانے اور شی کے درمیان ملاقات ممکن نہیں سمجھی جارہی ہے۔

بیجنگ میں، لامیچھانے کے چینی نائب صدر ہان ژینگ اور وزیر خارجہ وانگ یی سے ملاقات کرنے کی توقع ہے۔ ان کی پہلی ملاقات چینی کمیونسٹ پارٹی کے محکمہ خارجہ کے سربراہ لیو ہیشنگ سے ہوگی۔ یہ لیو ہی تھے جنہوں نے لامیچھانے کو چین آنے کی دعوت دی ہے۔

لامیچھانے پانچ رکنی نیپالی وفد کی قیادت کریں گے۔ ان کی اہلیہ نکیتا پوڈیال کے بھی وفد کا حصہ ہونے کی اطلاع ہے۔ بیجنگ کے بعد، لامیچھانے کی قیادت والا وفد تبت میں کیلاش مانسروور کا بھی دورہ کرے گا۔

جون کے مہینے میں اپنے ہندوستان کے دورے کے دوران، روی لامیچھانے نے ہندوستانی وزیر اعظم نریندر مودی، وزیر داخلہ امت شاہ، وزیر خارجہ ایس جے شنکر، اور قومی سلامتی کے مشیر اجیت ڈوبھال سے ملاقات کی تھی۔ انہوں نے مختلف مسائل پر بی جے پی صدر نتن نوین سمیت پارٹی کے دیگر رہنماوں سے بھی بات چیت کی تھی۔

ہندوستھان سماچار

---------------

ہندوستان سماچار / عبدالسلام صدیقی