نئی دہلی، 10 اگست(ہ س)۔ گھریلو شیئربازار آج دن بھرمحدوددائرہ میں تجارت کے بعد معمولی اضافہ کے ساتھ بند ہوا۔ آج کی تجارت بھی معمولی اضافہکے ساتھ فلیٹ نوٹ پر شروع ہوئی۔ مارکیٹ کے کھلنے کے بعد، سینسکس اور نفٹی دونوں انڈیکس میں معمولی اتار چڑھاو کے ساتھ تجارت ہوئی کیونکہ عالمی مارکیٹ سے متضاد رجحانوں کی وجہ سے خریداروں اور فروخت کنندگان نے ایک دوسرے کو پیچھے چھوڑنے کی کوشش کی۔ سینسکس نے دن کی تجارت 0.06 فیصد کے معمولی اضافے کے ساتھ بند کی۔ اسی طرح، نفٹی نے آج کی تجارت 0.05 فیصد کے اضافے کے ساتھ ختم کی۔

بی ایس ای کا سینسکس آج 2.42 پوائنٹس کے اضافہ کے ساتھ 78,501.59 پوائنٹس کی سطح پر کھلا۔ مارکیٹ کھلنے کے فورا بعد خریداری شروع ہونے کے ساتھ ہی انڈیکس پہلے پانچ منٹ میں 177.81 پوائنٹس یعنی 0.23 فیصد چھلانگ لگا کر 78,676.98 کی سطح پر پہنچ گیا۔ اس کے بعد مارکیٹ میں فروخت کا دباو تھا، جس کی وجہ سے آدھے گھنٹے کی تجارت میں سینسکس اپنے تمام فوائد کھو بیٹھا۔کچھ ہی دیر بعد، انڈیکس 375 پوائنٹس سے زیادہ گر کر 200.25 پوائنٹس، یعنی 0.26 فیصد کی کمزوری کے ساتھ 78,298.92 کے نچلے درجے پر آگیا۔ اس کے بعد خریداروں نے ایک بار اپنی خریداری شروع کی، جس سے انڈیکس کی نقل و حرکت میں بہتری آئی۔ خریداری کی حمایت کی وجہ سے انڈیکس صبح 10.30 بجے تک شبزنشان پر واپس آگیا۔ اس کے بعد، انڈیکس نے دن بھر معمولی اتار چڑھاو کے ساتھ تجارت کی۔ دن کی خرید و فروخت کے بعد، سینسکس 43.27 پوائنٹس کے معمولی اضافہ کے ساتھ 78,542.44 پوائنٹس کی سطح پر بند ہوا۔

سینسکس کی طرح، این ایس ای نفٹی نے آج 10.60 پوائنٹس یعنی 0.04 فیصدکے معمولی اضافہ کے ساتھ 24,581.25 سطح پر تجارت شروع کی۔ مارکیٹ کھلتے ہی خریداری شروع ہونے کے پہلے پانچ منٹ میں انڈیکس 50.30 پوائنٹس یعنی 0.20 فیصد بڑھ کر 24,620.95 کے نشان تک پہنچ گیا۔ اس کے بعد مارکیٹ میں فروخت شروع ہوئی جس کی وجہ سے نفٹی کی حرکت کمزور ہونے لگی۔تجارت کے پہلے آدھے گھنٹے میں، انڈیکس فروخت کے دباو کی وجہ سے 59.55 پوائنٹس، یعنی 0.24 فیصد کی کمزوری کے ساتھ دن کی بلند ترین سطح سے تقریبا 110 پوائنٹس گر کر 24,511.10 کی نچلی سطح پر آگیا۔ اس کے بعد، انڈیکس نے دن بھر معمولی اتار چڑھاو کے ساتھ ایک محدود دائرہ میں تجارت کی۔ خرید و فروخت کے پورے دن کے بعد، نفٹی 13.15 پوائنٹس کی علامتی مضبوطی کے ساتھ 24,583.80 پوائنٹس کی سطح پر بند ہوا۔

آج دن کی تجارت کے دوران رئیلٹی، کنزیومر ڈیوریبلز اور پرائیویٹ بینک سیکٹر کے اسٹاک میں مسلسل خریداری ہوئی۔ اسی طرح آئی ٹی، کیپٹل گڈز، ایف ایم سی جی اور میٹل انڈیکس بھی سبز نشانمیں بند ہوئے۔ دوسری طرف پی ایس یو بینک اور انفراسٹرکچر سیکٹر کے اسٹاک فروخت کے دباو میں تھے۔ اس کے ساتھ ہی پبلک سیکٹر انٹرپرائز، ہیلتھ کیئر اور آٹوموبائل انڈیکس بھی کمزوری کے ساتھ سرخ نشان میں بند ہوئے۔ وسیع تر بازار آج مخلوط تجارت کر رہے تھے۔ نفٹی مڈکیپ انڈیکس 0.62 فیصد مضبوط ہوکر بند ہوا، جبکہ ا سمال کیپ انڈیکس نے آج کی تجارت 0.27 فیصد گراوٹ کے ساتھ ختم کی۔

آج اسٹاک مارکیٹ میں دن بھر کے اتار چڑھاو کی وجہ سے اسٹاک مارکیٹ کے سرمایہ کاروں کی دولت میں تقریبا ساٹھ ہزار کروڑ روپے کی کمی واقع ہوئی۔ آج کی تجارت کے بعد بی ایس ای میں درج کمپنیوں کا مارکیٹ کیپٹلائزیشن کم ہو کر 494.22 لاکھ کروڑ روپے (عارضی) رہ گیا۔ جبکہ گزشتہ ہفتے کے آخری تجارتی دن یعنی جمعہ کو ان کا مارکیٹ کیپٹلائزیشن 494.81 لاکھ کروڑ روپے تھا۔ اس طرح آج کی تجارت سے سرمایہ کاروں کو تقریبا 59,000 کروڑ روپے کا نقصان ہوا۔

دن کے دوران بی ایس ای کے 4,645 حصص میں فعال تجارت ہوئی۔ ان میں سے 194 حصص بغیر کسی حرکت کے بند ہوئے، جبکہ 2,225 حصص فوائد کے ساتھ بند ہوئے، جبکہ 2,226 حصص میں گراوٹ کا رجحان رہا۔ اس کے ساتھ ہی آج این ایس ای کے 3,067 حصص میں فعال تجارت ہو رہی تھی۔ ان میں سے 1,518 حصص فوائد کے ساتھ سبز نشان میں بند ہوئے اور 1,549 حصص نقصان کے ساتھ سرخ نشان میں بند ہوئے۔ اسی طرح سینسکس کے 30 حصص میں سے 18 میں اضافہ ہوا، 11 میں کمی ہوئی اور ایک میں کوئی تبدیلی نہیں ہوئی۔ حصص کی نفٹی 50 ٹوکری میں 25 سبز، 23 سرخ اور دو میں کوئی تبدیلی نہیں ہوئی۔

بڑے اسٹاک مارکیٹ ہیوی ویٹس میں، ٹائٹن کمپنی 3.02 فیصد، ٹاٹا کنزیومر پروڈکٹس 2.44 فیصد، بجاج فنانس 2.24 فیصد، شری رام فنانس 2.04 فیصد اور گراسم انڈسٹریز 1.73 فیصد دن کے ٹاپ 5 فائدہ اٹھانے والوں میں شامل تھے۔ دوسری طرف، اسٹیٹ بینک آف انڈیا 2.39 فیصد، ایٹرنل 1.51 فیصد، آئی ٹی سی 1.21 فیصد، ڈاکٹر ریڈیز لیبارٹریز 1.13 فیصد اور ٹی سی ایس 1.10 فیصد دن کے سب سے زیادہ نقصان اٹھانے والے 5 حصص میں شامل تھے۔

ہندوستھان سماچار

---------------

ہندوستان سماچار / عبدالسلام صدیقی