نئی دہلی، 10 اگست (ہ س)۔ کامن ویلتھ گیمز 2026 میں مردوں کے 55 کلوگرام زمرے میں چاندی کا تمغہ جیتنے والے بھارتی باکسر جادومنی سنگھ نے وزیر اعظم نریندر مودی کے ساتھ ملاقات کے دوران کارگل وجے دیوس پر پاکستان کے خلاف حاصل کی گئی اپنی کامیابی کا ذکر کیا۔

جادومنی نے بتایا کہ بھارتی فوج سے وابستہ ہونے کی وجہ سے پاکستان کے باکسر کے خلاف یہ مقابلہ ان کے لیے انتہائی خاص تھا۔ انہوں نے اپنی فتح کارگل جنگ کے بہادر بھارتی فوجیوں کے نام وقف کی۔

وزیر اعظم نریندر مودی نے اتوار کو نئی دہلی میں واقع اپنی رہائش گاہ پر کامن ویلتھ گیمز 2026 میں تمغے جیتنے والے بھارتی کھلاڑیوں سے ملاقات کی۔ اس دوران کھلاڑیوں نے کھیلوں سے متعلق اپنے یادگار تجربات وزیر اعظم کے ساتھ شیئر کیے۔وزیر اعظم نے جادومنی سے کارگل وجے دیوس کے موقع پر حاصل ہونے والی ان کی کامیابی کے بارے میں دریافت کیا۔جادومنی نے بتایا کہ کامن ویلتھ گیمز میں ان کا مقابلہ کارگل وجے دیوس کے دن پاکستان کے ثمامہ رحمان سے ہوا تھا۔ انہوں نے کہا کہ بھارتی فوج سے وابستہ ہونے کی وجہ سے وہ پاکستان کے خلاف کامیابی حاصل کرنے کے لیے پوری طرح پُرعزم تھے۔جادومنی نے پری کوارٹر فائنل مقابلے میں ثُما مہ رحمان کو 5-0 کے متفقہ فیصلے سے شکست دی اور اپنی فتح بھارتی فوج کے بہادر جوانوں کے نام وقف کی۔

وزیر اعظم مودی نے جادومنی کے اس جذبے کی تعریف کرتے ہوئے کہا کہ کارگل کے بہادر فوجیوں کے نام اپنی کامیابی وقف کرنے سے ان کی اس کامیابی کی اہمیت مزید بڑھ گئی۔ انہوں نے کہا کہ جادومنی نے جس حریف کو شکست دینی تھی، اسے شکست دے کر ملک کے لیے فخر کا لمحہ پیدا کیا۔

ملاقات کے دوران وزیر اعظم مودی نے ویٹ لفٹر میرابائی چانو کے تمغہ جیتنے کے بعد جذباتی ہونے کے لمحے کی بھی تعریف کی۔ چانو نے گلاسگو کامن ویلتھ گیمز 2026 میں خواتین کے 48 کلوگرام زمرے میں طلائی تمغہ جیت کر کامن ویلتھ گیمز میں اپنا تیسرا طلائی تمغہ حاصل کیا۔

ہندوستھان سماچار

ہندوستان سماچار / Mohammad Khan