لاگوس، 10 اگست (ہ س)۔

انڈر-23 دولت مشترکہ تلوار بازی چیمپئن شپ میں ہندوستانی دستے نے پہلے ہی دن شاندار کارکردگی کا مظاہرہ کرتے ہوئے مجموعی طور پر 17 تمغے اپنے نام کیے۔ ہندوستان نے مردوں اور خواتین کے انفرادی مقابلوں میں چار طلائی، چار چاندی اور نو کانسے کے تمغے جیت کر بین الاقوامی تلوار بازی کے میدان میں اب تک کی اپنی سب سے شاندار کارکردگی پیش کی۔ یہ مقابلہ 9 اگست سے شروع ہوا ہے اور 14 اگست تک جاری رہے گا۔

ہندوستانی کھلاڑیوں نے تمام زمروں میں اپنی مضبوط موجودگی درج کرائی۔ سیبر، فائل اور ایپی کے چھ انفرادی مقابلوں میں سے ہر ایک میں کم از کم ایک ہندوستانی تلوارباز نے تمغہ حاصل کیا۔

مردوں کے سیبر مقابلے میں ہندوستانی کھلاڑیوں نے پوڈیم پر مکمل قبضہ کر لیا۔ نکھل واگھ نے طلائی تمغہ جیتا، جبکہ لکشیہ بادسر نے چاندی کا تمغہ حاصل کیا۔

اشونی آریہ اور لائیش رام مورامبا نے کانسے کے تمغے جیت کر ہندوستان کے لیے شاندار کلین سویپ مکمل کیا۔ مردوں کے فائل مقابلے میں تیجس پاٹل نے چاندی اور ہیمش سنسَم نے کانسے کا تمغہ جیتا۔ اس مقابلے میں انگلینڈ کے اولیور نے طلائی تمغہ حاصل کیا۔

مردوں کے ایپی مقابلے میں لوکیش ویمانی نے چاندی کا تمغہ جیتا، جبکہ شوریہ اشونی اور گاڈون انبکیس نے کانسے کے تمغے اپنے نام کیے۔ نائجیریا کے تھامسن نے طلائی تمغہ حاصل کیا۔

خواتین کے زمرے میں بھی ہندوستانی کھلاڑیوں کا جلوہ

خواتین کے زمرے میں بھی ہندوستانی تلواربازوں کا غلبہ برقرار رہا۔ خواتین کے فائل مقابلے میں جائس اشیتا نے طلائی تمغہ جیتا، جبکہ ان کی ہندوستانی ساتھی کاناگالکشمی نے چاندی کا تمغہ حاصل کیا۔

خواتین کے ایپی مقابلے میں پراچی لوہان نے طلائی تمغہ جیتا۔ نِویدیا نائر اور انوپریا نے کانسے کے تمغے اپنے نام کیے۔

خواتین کے سیبر مقابلے میں جیفرلین نے طلائی اور آخاری نے چاندی کا تمغہ جیتا، جبکہ شریا گپتا نے کانسے کا تمغہ حاصل کیا۔

ہندوستھان سماچار

ہندوستان سماچار / عطاءاللہ