ممبئی، یکم اگست (ہ س)۔ مرکزی وزیر داخلہ امت شاہ نے ہفتہ کو پونے میں منعقدہ ایک تقریب میں قومی سلامتی کے مشیر (این ایس اے) اجیت ڈوبھال کو باوقار لوک مانیا تلک ایوارڈ سے نوازا۔ اس موقع پر امت شاہ اور وزیر اعلی دیویندر فڑنویس نے لوک مانیہ تلک کے بیش بہاتعاون کو یاد کیا اور اجیت ڈوبھال کی ملک کے لئے خدمات کی تعریف کی۔

مرکزی وزیر داخلہ شاہ آج پونے میں لوک مانیہ تلک کی 106ویں برسی کے موقع پر منعقدہ ایک پروگرام سے خطاب کر رہے تھے۔ اجیت ڈوھال کو لوک مانیہ تلک ایوارڈ سے نوازے جانے پر خوشی کا اظہار کرتے ہوئے انہوں نے ان سے اپنی پہلی ملاقات کو یاد کیا۔ انہوں نے کہا کہ جب گجرات میں بم دھماکے ہوئے تو نریندر مودی وزیر اعلیٰ تھے اور وہ گجرات کے وزیر داخلہ تھے۔ انہوں نے اس واقعہ کو یاد کیا جب ڈوبھال کو سینئر پولیس افسران کے ساتھ بات چیت کے بعد مزید فیصلے لینے کو کہا گیا تھا۔ انہوں نے کہا کہ اس دوران وہ ڈوبھال سے واقف ہوئے اور گجرات پولیس نے ملک میں ہوئے 14 بم دھماکوں کو حل کیا۔

شاہ نے کہا کہ 1972 کے بعد سے ملک کو درپیش ہر بحران کو حل کرنے میں اجیت ڈوبھال کی شراکت اہم رہی ہے اور اس کا مکمل اندازہ لگانا مشکل ہے۔ انہوں نے کہا کہ انہوں نے انتہائی مشکل حالات میں چھ سال تک پاکستان میں کام کیا، ملک کی داخلی سلامتی کو مضبوط بنانے کی کوشش کی اور کئی سال تک خارجہ پالیسی، قومی سلامتی اور خلائی سلامتی سے متعلق شعبوں میں بھی کام کیا۔ انہوں نے یہ بھی بتایا کہ وہ گزشتہ بارہ برسوں سے وزیر اعظم نریندر مودی کے ساتھ کام کر رہے ہیں۔

مرکزی وزیر داخلہ نے آج پونے میں ایک تقریب میں لوک مانیہ تلک کے ساتھ ساتھ جمہوریت نواز انابھاو¿ ساٹھے کو بھی خراج عقیدت پیش کیا۔ انہوں نے کہا کہ انابھاو¿ ساٹھے، جنہوں نے متنگ برادری میں جنم لیا اور اپنی مختصر زندگی میں سماجی بیداری کا بہت کام کیا، ایک سماجی مصلح اور مصنف بھی تھے۔ انہوں نے کہا کہ لوک مانیہ تلک کے کام کو کسی کتاب میں سمیٹنا ناممکن ہے۔ انہوں نے جدوجہد آزادی میں ان کی خدمات کا خاص طور پر ذکر کیا۔

انہوں نے کہا کہ تلک نے لوگوں کے ذہنوں میں سوراج کا جذبہ بیدار کیا، گنیشوتسو اور شیو جینتی جیسے عوامی تہواروں کے ذریعے سماج کو متحد کیا اور قومی شعور کو بیدار کیا۔ انہوں نے کہا کہ تلک ایک نڈر صحافی، کرم یوگی اور قوم پرست مفکر تھے۔ صحافت کے اصولوں کو تلک سے اخذ کرنے کا مطالبہ کرتے ہوئے انہوں نے نوجوانوں پر زور دیا کہ وہ گیتا رہسیہ اور لوک مانیہ کا ادب پڑھیں۔

شاہ نے یہ بھیبتایا کہ پونے میں تعلیمی نظام کو قائم کرنے میں تلک کی شراکت اہم تھی اور انہوں نے لوگوں کو اپنی تعلیم کو ملک کے لیے وقف کرنے کی ترغیب دی۔ یہ بتاتے ہوئے کہ خود انحصاری، بے خوف ہونااورسوراجیہ کے تصورات تلک کی سوچ کا کلیدی حصہ تھے، انہوں نے یہ بھی کہا کہ مہاتما گاندھی کو تلک کو لوک مانیہ کے طور پر تسلیم کرنا پڑا تھا۔

ایوارڈ حاصل کرنے کے بعد اپنے خطاب میں این ایس اے ڈوبھال نے نوجوانوں پر زور دیا کہ وہ آزادی کے حقیقی معنی کو سمجھیں۔ انہوں نے وزیر اعظم نریندر مودی اور امت شاہ کی قیادت کی بھی تعریف کی۔ انہوں نے کہا کہ ہندوستان اس وقت اندرونی اور بیرونی چیلنجوں سے نمٹ رہا ہے اور تیزی سے ترقی کر رہا ہے۔

ہندوستھان سماچار

ہندوستان سماچار / محمد شہزاد