گلاسگو، یکم اگست (ہ س)۔ دولتِ مشترکہ کھیل 2026 میں بھارتی ایتھلیٹکس دستے کی شاندار کارکردگی کا سلسلہ جاری ہے۔ ہفتہ کے روز مردوں کے ٹرپل جمپ مقابلے میں پروین چترویل نے چاندی جبکہ سیلوا پربھو تھیرومارن نے کانسے کا تمغہ جیت کر بھارت کو تاریخی دو میڈل دلایا۔

پروین چترویل نے اپنی چوتھی کوشش میں 16.58 میٹر کی چھلانگ لگا کر دوسرا مقام حاصل کیا اور چاندی کا تمغہ اپنے نام کیا۔ دوسری جانب سیلوا پربھو تھیرومارن نے 16.52 میٹر کی بہترین چھلانگ کے ساتھ تیسری پوزیشن حاصل کرتے ہوئے کانسے کا تمغہ جیتا۔

پروین کی شروعات توقعات کے مطابق نہیں رہی۔ ابتدائی تین راؤنڈز کے بعد وہ 16.05 میٹر کی چھلانگ کے ساتھ پانچویں مقام پر تھے۔ تیسرے راؤنڈ میں انہوں نے 16.31 میٹر کی چھلانگ لگائی اور پھر چوتھی کوشش میں 16.58 میٹر کی شاندار کارکردگی دکھا کر کچھ دیر کے لیے پہلی پوزیشن پر پہنچ گئے، تاہم آخر میں انہیں چاندی کے تمغے پر اکتفا کرنا پڑا۔

دوسری جانب سیلوا پربھو نے دوسری کوشش میں 16.17 میٹر کی چھلانگ لگا کر کانسے کے تمغے کی دوڑ میں جگہ بنائی۔ تیسرے راؤنڈ میں انہوں نے اپنی کارکردگی بہتر کرتے ہوئے 16.43 میٹر کی چھلانگ لگائی اور آخرکار 16.52 میٹر کی بہترین کوشش کے ساتھ تیسری پوزیشن برقرار رکھتے ہوئے کانسے کا تمغہ اپنے نام کیا۔

اس ڈبل پوڈیم کے ساتھ گلاسگو دولتِ مشترکہ کھیلوں میں ایتھلیٹکس میں بھارت کی شاندار مہم مزید مضبوط ہو گئی ہے۔ بھارتی ایتھلیٹس مسلسل تمغے جیت کر ملک کے کھاتے میں کامیابیاں شامل کر رہے ہیں اور ٹریک اینڈ فیلڈ مقابلوں میں بھارت کی مضبوط موجودگی کا بھرپور مظاہرہ کر رہے ہیں۔

ہندوستھان سماچار

---------------

ہندوستان سماچار / عبدالواحد