بھوگاپورم، یکم اگست (ہ س)۔ وزیر اعظم نریندر مودی نے ہفتہ کو آندھرا پردیش کے وجے نگرم ضلع کے بھوگاپورم میں 17,900 کروڑ روپے سے زیادہ کے مختلف ترقیاتی پروجیکٹوں کا افتتاح کیا، نقاب کشائی کی اور سنگ بنیاد رکھا۔

وزیر اعظم نے اس سے پہلے بھوگا پورم میں الوری سیتارام راجو بین الاقوامی ہوائی اڈے کے مسافر ٹرمینل کا معائنہ کیا۔ اس کے بعد انہوں نے 5,640 کروڑ روپے سے زیادہ کی لاگت سے پبلک پرائیویٹ پارٹنرشپ (پی پی پی ) ماڈل کے تحت تیار کیے گئے گرین فیلڈ انٹرنیشنل ایئرپورٹ کا افتتاح کیا اور بھوگا پورم میں 17,900 کروڑ روپے سے زیادہ کے کئی ترقیاتی پروجیکٹوں کا سنگ بنیاد رکھا اور انہیں قوم کے نام وقف کیا۔

ساٹھ لاکھ کی سالانہ مسافروں کی گنجائش والے اس ہوائی اڈے میں مصنوعی ذہانت ( اے آئی )، مسافروں کی بایو میٹرک پروسیسنگ، خودکار بیگیج نظام اور ایئر پورٹ پریڈیکٹو آپریشنز سینٹر جیسی جدید ٹیکنالوجیز کا استعمال کیا گیا ہے۔ اس کا فن تعمیر آندھرا پردیش کی روایتی 'چٹیلو' جھونپڑیوں، وادی اراکو اور اڑنے والی مچھلی سے متاثر ہے۔

وزیر اعظم نے وشاکھاپٹنم میں آندھرا پردیش کے پہلے سیمی کنڈکٹر مینوفیکچرنگ یونٹ کا بھی سنگ بنیاد رکھا جس کی لاگت 460 کروڑ روپے سے زیادہ ہے۔ انڈیا سیمی کنڈکٹر مشن کے تحت منظور شدہ، یہ پروجیکٹ اے ایس آئی پی ٹیکنالوجی پرائیویٹ لمیٹڈ اور جنوبی کوریا کی اے پی اے سی ٹی کی شراکت داری سے تیار کیا جا رہا ہے ۔ پلانٹ سالانہ تقریباً 96 ملین سیمی کنڈکٹر چپس تیار کرے گا اور اعلیٰ ہنر مند روزگار کے نئے مواقع پیدا کرے گا۔

اس کے علاوہ، وزیر اعظم نے کرنول-4 قابل تجدید توانائی زون (آر ای زیڈ) فیز-1 ٹرانسمیشن سسٹم کا سنگ بنیاد رکھا، جس کی لاگت تقریباً 5,550 کروڑ روپے ہے۔ انہوں نے بالترتیب 3,550 کروڑ اور 820 کروڑ روپے کے مختلف پاور ٹرانسمیشن پروجیکٹوں کا بھی افتتاح کیا۔ یہ منصوبے کرنول اور اننت پور میں قابل تجدید توانائی کے شعبوں سے پیدا ہونے والی بجلی کی قومی گرڈ کے ذریعے ملک بھر میں بہتر تقسیم کرنے کے قابل بنائیں گے اور ماحول دوست توانائی کو فروغ دیں گے۔

وزیر اعظم نے 1,880 کروڑ روپے سے زیادہ کے قومی شاہراہ کے پروجیکٹوں کا افتتاح اور سنگ بنیاد بھی رکھا۔ ان میں این ایچ-365بی جی کے ریچریلا-گرووائگوڈیم اور گرووائگوڈیم-دیوراپلے گرین فیلڈ چار لین والے حصے، این ایچ-67 پرتاڈی پتری بائی پاس، اوراین ایچ-565 پر لنگ سمدرم ہائی لیول پل شامل ہیں۔ اس پروجیکٹ سے وجے واڑہ سمیت کئی شہروں میں ٹریفک کا دباو کم ہوگا، سڑک کے تحفظمیں اضافہ ہوگا اور وشاکھاپٹنم اور حیدرآباد کے درمیان سفر کے وقت میں کمی آئے گی۔

ہندوستھان سماچار

ہندوستان سماچار / محمد شہزاد