میسور، یکم اگست (ہ س)۔

وزیر اعظم نریندر مودی نے ہفتہ کو میسور میں شری رام کرشن آشرم کے احاطے میں سوامی ویویکانند ثقافتی یوتھ سینٹر ویویک اسمارک کا افتتاح کرتے ہوئے نوجوانوں سے قوم کو اولین ترجیح دینے کے جذبے کے ساتھ آگے بڑھنے کی اپیل کی۔ انہوں نے کہا کہ یہ یادگار ایسے نوجوانوں کی تربیت کا مرکز بنے گی جن کے لیے قومی مفاد سب سے بڑھ کر ہو اور غریبوں، محروم طبقات اور معاشرے کی خدمت ہی زندگی کا مقصد ہو۔ انہوں نے کہا کہ آج بھارت کی اقتصادی، تکنیکی اور عالمی کامیابیوں کے پیچھے ملک کے نوجوانوں کی طاقت ہے اور یہی نوجوان ترقی یافتہ بھارت کی تعمیر کی بنیاد بنیں گے۔

وزیر اعظم نے اپنے خطاب کا آغاز میسور کی دیوی چامنڈیشوری کو خراجِ عقیدت پیش کرتے ہوئے کیا۔ انہوں نے کہا کہ دو روز قبل ہی ملک نے گرو پورنیما منائی تھی اور ان کی زندگی کے سفر میں رام کرشن مشن کا بہت بڑا کردار رہا ہے۔ انہوں نے کہا کہ جہاں سے ان کے سفر کا آغاز ہوا اور آج وہ جس مقام پر پہنچے ہیں، اس میں رام کرشن مشن کی اہم شراکت رہی ہے۔

انہوں نے کہا کہ میسور بھارت کی قدیم تہذیبی و ثقافتی شعور کا ایک اہم مرکز رہا ہے۔ یہاں کے مندروں، روایات، دسہرہ، شاہی محل، موسیقی اور ادب میں بھارت کی شاندار ثقافتی وراثت جھلکتی ہے۔ انہوں نے کہا کہ یہ خوش آئند ہے کہ میسور نے اپنی اس وراثت کو محفوظ رکھا ہے۔ شری رام کرشن آشرم اور سوامی ویویکانند کی یادیں بھی اسی عظیم وراثت کا حصہ ہیں۔ وزیر اعظم نے بتایا کہ انہوں نے اس تاریخی عمارت کا بھی دورہ کیا جہاں سوامی ویویکانند اپنے قیام کے دوران ٹھہرے تھے۔ انہوں نے کہا کہ راشٹرکوی کوویَمپو سمیت متعدد دانشوروں کا بھی رام کرشن آشرم سے گہرا تعلق رہا ہے اور ویویک اسمارک اس وراثت کو مزید وسعت دے گا۔

انہوں نے کہا کہ سوامی ویویکانند نے ہندوستانی ثقافت اور مذہبی تعلیمات کے بنیادی پیغام کو پوری طرح اپنایا تھا۔ ان کا ماننا تھا کہ حقیقی معنوں میں وہی شخص زندہ ہے جو دوسروں کے لیے جیتا ہے۔ اسی فکر کو آگے بڑھاتے ہوئے میسور کا رام کرشن آشرم گزشتہ سو برس سے تعلیم، صحت، آفات میں امداد اور سماجی خدمت کے متعدد کام انجام دے رہا ہے۔ وزیر اعظم نے یقین ظاہر کیا کہ ویویک اسمارک روحانی جستجو رکھنے والوں اور عقیدت مندوں کے لیے روحانی تحریک کا مرکز بنے گا۔

انہوں نے کہا کہ سوامی ویویکانند نوجوانوں کی تعلیم کو قوم کی تعمیر کی سب سے مضبوط بنیاد تصور کرتے تھے۔ غلامی کے دور میں ہندوستانی نوجوان مواقع سے محروم تھا لیکن آج یہی نوجوان دنیا کی ترقی کو رفتار دے رہا ہے۔ انہوں نے کہا کہ بھارت اس وقت دنیا کی سب سے تیزی سے ترقی کرنے والی معیشت، دنیا کا تیسرا بڑا اسٹارٹ اپ ایکو سسٹم، دوسرا بڑا موبائل فون ساز ملک ہے اور ڈیجیٹل حل کے میدان میں کئی ممالک کے لیے مثال بن چکا ہے۔ بھارت سیمی کنڈکٹر مینوفیکچرنگ کے شعبے میں بھی تیزی سے آگے بڑھ رہا ہے اور ان تمام کامیابیوں کے پیچھے نوجوانوں کی طاقت کارفرما ہے۔

وزیر اعظم نے کہا کہ نئی قومی تعلیمی پالیسی نوجوانوں کو اکیسویں صدی کی ضروریات کے مطابق تیار کر رہی ہے۔ ملک بھر میں 14 ہزار سے زیادہ پی ایم شری اسکول تیار کیے گئے ہیں جبکہ 10 ہزار سے زائد اٹل ٹنکرنگ لیب قائم کی گئی ہیں تاکہ بچوں میں اختراع اور سائنسی سوچ کو فروغ دیا جا سکے۔ انہوں نے کہا کہ حکومت تعلیم میں مساوی مواقع کو یقینی بنا رہی ہے۔ اب لڑکیاں بھی سینک اسکولوں اور نیشنل ڈیفنس اکیڈمی میں داخلہ لے کر ملک کی خدمت کر رہی ہیں جبکہ میڈیکل اور انجینئرنگ کی تعلیم مادری زبانوں میں بھی فراہم کی جا رہی ہے۔

انہوں نے میسور کے عوام کو ملک کے صاف ترین شہروں میں اپنا مقام برقرار رکھنے پر مبارکباد دی اور صفائی، ماحولیات کے تحفظ اور آبی وسائل کے تحفظ کا عہد دہرانے کی اپیل کی۔ انہوں نے کنڑ زبان اور ادب کو نئی نسل سے جوڑنے، مطالعے کی ثقافت کو فروغ دینے اور ووکل فار لوکل کے پیغام کے تحت میسور کے ریشم، صندل اور دستکاری جیسی ہندوستانی مصنوعات کو بطور تحفہ اپنانے کی اپیل کی۔

وزیر اعظم نے یقین ظاہر کیا کہ سوامی ویویکانند کے نظریات سے متاثر ویویک اسمارک قوم کی تعمیر کے لیے وقف نئی نسل تیار کرنے کا ایک مضبوط مرکز بنے گا اور ترقی یافتہ بھارت کے عزم کو نئی توانائی فراہم کرے گا۔

ہندوستھان سماچار

ہندوستان سماچار / عطاءاللہ