دولت مشترکہ کھیلوں میں ایم پی کے کھلاڑیوں کی شاندار کارکردگی، یامنی اور اجے کو حکومت 25-25 لاکھ روپے اور نوکری دے گی

۔ جوڈو میں یامنی اور ویٹ لفٹنگ میں اجے بابو نے سلور میڈل جیتے، وزیر سارنگ نے ویڈیو کال پر مبارکباد دی

بھوپال، یکم اگست (ہ س)۔ دولت مشترکہ کھیلوں میں ہندوستانی کھلاڑیوں کی شاندار کارکردگی کے درمیان مدھیہ پردیش کے کھلاڑیوں نے اپنی صلاحیتوں کا لوہا منواتے ہوئے ریاست کا وقار بڑھایا ہے۔ جوڈو میں ساگر کی یامنی موریہ اور ویٹ لفٹنگ میں اجے بابو نے شاندار کارکردگی کا مظاہرہ کرتے ہوئے سلور میڈل اپنے نام کیا۔ دونوں کھلاڑیوں کی اس کامیابی پر مدھیہ پردیش کے وزیر برائے کھیل و نوجوانوں کی فلاح و بہبود وشواس کیلاش سارنگ نے مسرت کا اظہار کرتے ہوئے دونوں کو 25-25 لاکھ روپے اور سرکاری نوکری دینے کا اعلان کیا ہے۔

وزیر سارنگ نے اپنے پیغام میں کہا کہ ہندوستانی کھلاڑی بین الاقوامی سطح پر مسلسل شاندار کارکردگی کا مظاہرہ کر کے ملک کا نام روشن کر رہے ہیں۔ ایسے میں مدھیہ پردیش کے دو کھلاڑیوں کا کامن ویلتھ گیمز میں تمغہ جیتنا پوری ریاست کے لیے باعثِ فخر اور قابلِ تقلید ہے۔ انہوں نے کہا کہ یامنی موریہ نے 57 کلوگرام جوڈو میں شاندار جدوجہد اور تکنیکی مہارت کا مظاہرہ کرتے ہوئے سلور میڈل حاصل کیا، جبکہ اجے بابو نے ویٹ لفٹنگ میں عمدہ کارکردگی دکھا کر سلور میڈل جیت کر ریاست اور ملک کا نام روشن کیا ہے۔

وزیر نے کہا کہ یہ کامیابی ریاست کے ابھرتے ہوئے کھلاڑیوں کے لیے مشعلِ راہ بنے گی اور انہیں بڑے پلیٹ فارمز پر بہترین کارکردگی کا مظاہرہ کرنے کا اعتماد دے گی۔ انہوں نے امید ظاہر کی کہ آنے والے مقابلے میں بھی مدھیہ پردیش اور ہندوستان کے کھلاڑی اسی طرح بہترین کارکردگی کا مظاہرہ کرتے ہوئے زیادہ سے زیادہ تمغے جیتیں گے۔ دولت مشترکہ کھیلوں میں جوڈو مقابلے میں سلور میڈل جیت کر مدھیہ پردیش کا نام روشن کرنے والی کھلاڑی یامنی موریہ سے ہفتہ کو وزیر سارنگ نے ویڈیو کال پر ان سے بات چیت کی اور اس بڑی کامیابی پر دلی مبارکباد و نیک خواہشات پیش کیں۔ انہوں نے کہا کہ یامنی موریہ کی یہ کامیابی مدھیہ پردیش اور ملک کے لیے فخر کا باعث ہے۔ انہوں نے ان کے روشن مستقبل کی تمنا کرتے ہوئے آنے والے بین الاقوامی مقابلے میں گولڈ میڈل جیتنے کا اعتماد ظاہر کیا۔

وزیر سارنگ نے اعلان کیا کہ مدھیہ پردیش حکومت کی کھیل پالیسی کے مطابق کامن ویلتھ گیمز میں سلور میڈل جیتنے والے یامنی موریہ اور اجے بابو کو 25-25 لاکھ روپے کی نقد رقم بطور حوصلہ افزائی دی جائے گی۔ اس کے ساتھ ہی کھیل پالیسی کی شقوں کے مطابق دونوں کھلاڑیوں کو سرکاری نوکری بھی دی جائے گی۔ وزیر سارنگ نے کہا کہ وزیر اعلیٰ ڈاکٹر موہن یادو کی قیادت میں ریاستی حکومت کھلاڑیوں کو عالمی سطح کا اسپورٹس انفراسٹرکچر، جدید تربیت، بہتر سہولیات اور حوصلہ افزائی فراہم کرنے کے لیے مسلسل کام کر رہی ہے۔ حکومت کا مقصد ایسا کھیل کا ماحول تیار کرنا ہے جس سے مدھیہ پردیش کے کھلاڑی قومی اور بین الاقوامی مقابلے میں مسلسل شاندار کارکردگی پیش کر کے ریاست اور ملک کا نام روشن کرتے رہیں۔

ہندوستھان سماچار

--------------

ہندوستان سماچار / انظر حسن