دتیا، یکم اگست (ہ س)۔

مدھیہ پردیش کے دتیا اسمبلی ضمنی انتخاب کے تحت پیر، 03 اگست کو گورنمنٹ پولی ٹیکنک کالج دتیا میں ووٹوں کی گنتی ہوگی۔ کلکٹر اور ضلع الیکشن آفیسر سوپنل وانکھیڑے نے بتایا کہ ووٹوں کی گنتی کی تمام ضروری تیاریاں مکمل کر لی گئی ہیں۔

کلکٹر وانکھیڑے نے ہفتہ کو کلکٹریٹ میں منعقدہ میٹنگ میں میڈیا کو بتایا کہ گنتی صبح 8 بجے ڈاک کے ذریعے موصول ہونے والے بیلٹ پیپرز کی گنتی کے ساتھ شروع ہوگی۔ اس کے بعد صبح 8.30 بجے سے ای وی ایم میں درج ووٹوں کی گنتی شروع کی جائے گی۔ ووٹوں کی گنتی کے لیے کل 20 کاونٹنگ ٹیبل قائم کی گئی ہیں، جبکہ ڈاک کے ذریعہ موصول ہونے والے بیلٹ پیپرز کی گنتی کے لیے علیحدہ سے ایک کاونٹر بنایا گیا ہے۔

انہوں نے بتایا کہ ای وی ایم ووٹوں کی گنتی کل 15 مراحل (راونڈز) میں مکمل ہوگی۔ ہر کاونٹنگ ٹیبل پر تین افسران و ملازمین کی تعیناتی کی گئی ہے، جن میں ایک کاونٹنگ سپروائزر، ایک کاونٹنگ اسسٹنٹ اور ایک مائیکرو آبزرور شامل رہے گا۔ پوری گنتی کے کام میں تقریباً 350 افسران و ملازمین کی ڈیوٹی لگائی گئی ہے۔

کلکٹر نے بتایا کہ گنتی کے مقام پر سیکورٹی کے وسیع انتظامات کیے گئے ہیں۔ معقول پولیس فورس کی تعیناتی کے ساتھ موثر بیریکیڈنگ کا نظام یقینی بنایا گیا ہے، تاکہ گنتی کا عمل پرامن، غیر جانبدارانہ اور منظم طریقے سے مکمل ہو سکے۔ میڈیا نمائندوں کی سہولت کے لیے گنتی کے مقام گورنمنٹ پولی ٹیکنک کالج کی عمارت میں ہی جدید سہولیات سے آراستہ میڈیا سینٹر بھی قائم کیا گیا ہے، جہاں سے وہ گنتی کی تازہ ترین معلومات حاصل کر سکیں گے۔

قابلِ ذکر ہے کہ دتیا اسمبلی ضمنی انتخاب 2026 کے تحت گزشتہ 30 جولائی کو ووٹنگ ہوئی تھی۔ اس دوران علاقے میں کل 71.42 فیصد ووٹنگ ہوئی، جس میں مرد ووٹرز کا ووٹنگ فیصد 74.05، خواتین ووٹرز کا ووٹنگ فیصد 68.49 اور دیگر ووٹرز کا ووٹنگ فیصد 50 فیصد رہا۔

ضلع الیکشن آفس کے مطابق، دتیا میں درج کل 2,20,410 ووٹرز میں سے کل 1,57,414 ووٹرز نے ووٹ ڈالے، جس کا فیصد 71.42 رہا۔ ان میں کل 1,16,116 درج مرد ووٹرز میں سے 85,989 ووٹرز، 1,04,284 خواتین ووٹرز میں سے 71,420 اور 10 دیگر ووٹرز میں سے 5 ووٹرز نے ووٹ ڈالے۔

دتیا اسمبلی ضمنی انتخاب-2026 کے تحت 3 اگست 2026 کو منعقد ہونے والی گنتی کی تیاریوں کے سلسلے میں ہفتہ کو نیو کلکٹریٹ آفس کے ہال میں کاونٹنگ سپروائزر، کاونٹنگ اسسٹنٹ اور مائیکرو آبزرور کی تربیت کا اہتمام کیا گیا۔ تربیت کا پروگرام ضلع پنچایت کے چیف ایگزیکٹو آفیسر اکشے کمار تیمروال کی موجودگی میں مکمل ہوا۔ انہوں نے گنتی کے کام میں تعینات افسران و ملازمین کو الیکشن کمیشن کی ہدایات پر حرف بہ حرف عمل کرتے ہوئے مکمل غیر جانبداری، شفافیت اور احتیاط کے ساتھ ذمہ داریوں کو ادا کرنے کی ہدایت دی۔

تربیت کے دوران ماسٹر ٹرینر پروفیسر سدھیر پانڈے، لیکچرار منوج دوویدی اور ڈی ای او ودھا مشرا نے گنتی کے پورے طریقہ کار، ای وی ایم اور وی وی پیٹ سے متعلق شقوں، کاونٹنگ ٹیبل پر کیے جانے والے کاموں اور گنتی کے دوران برتی جانے والی احتیاطی تدابیر کی تفصیل سے معلومات دیں۔ اس موقع پر متعلقہ افسران و ملازمین موجود رہے۔ تربیت میں گنتی کے کام کو باقاعدہ، شفاف اور غلطی سے پاک ڈھنگ سے مکمل کرانے کے لیے ضروری طریقہ کار کی تفصیل سے مشق بھی کرائی گئی۔

ہندوستھان سماچار

---------------

ہندوستان سماچار / انظر حسن