کھونٹی،یکم اگست (ہ س)۔کررا بلاک کی چھاتا پنچایت میں واقع گورنمنٹ اپ گریڈیڈ ہائی اسکول چھاتا میں دوپہر کاکھانا(مڈ ڈے میل) کے نظام میں بے قاعدگیوں پر کھونٹی کے ایم ایل اے رام سوریہ منڈا نے شدید ناراضگی کا اظہار کیا ہے ۔ اسکول کے اچانک معائنہ کے دوران انہوں نے بچوں کی صحت اور سرکاری اسکیموں کے نفاذ کے بارے میں سنگین سوالات اٹھاتے ہوئے معاملے کی غیر جانبدارانہ تحقیقات اور ذمہ داروں کے خلاف سخت کارروائی کا مطالبہ کیا۔
معائنہ کے دوران ایم ایل اے نے دیکھا کہ مڈ ڈے میل کھلے میں تقسیم کیا جا رہا ہے۔ اس وقت بارش ہونے کی وجہ سے بارش کا پانی کھانے میں گر رہا تھا جبکہ طلبہ و طالبات اسے لے رہے تھے۔ اس کو بچوں کی صحت کے تئیں ایک سنگین لاپرواہی قرار دیتے ہوئے ایم ایل اے نے کہا کہ بچوں کو غذائیت سے بھرپور اور محفوظ کھانا فراہم کرنے والی اسکیم کے معیار پر سمجھوتہ ناقابل قبول ہے۔
معائنہ کے دوران ایم ایل اے نے یہ بھی الزام لگایا کہ ایک ٹیچر بچوں کو ملنے سے پہلے ہی مڈ ڈے میل کھا رہا تھا، جب کہ بچے بارش میں بھیگتے ہوئے انتظار کر رہے تھے۔ انہوں نے اسکول انچارج کی سرزنش کرتے ہوئے اسے انتہائی افسوس ناک اور ناقابل قبول قرار دیا۔
بچوں کے ساتھ بات چیت کے دوران، کئی طلبا نے شکایت کی کہ انہیں اکثر تجویز کردہ مینو کے مطابق کھانا نہیں ملتا اور انڈے باقاعدگی سے فراہم نہیں کیے جاتے۔ ایم ایل اے نے کہا کہ اگر سرکاری اسکیموں کے نفاذ میں اس طرح کی لاپرواہی جاری رہی تو غریب اور ضرورت مند بچوں کو اس کا سب سے زیادہ نقصان اٹھانا پڑے گا۔
رام سوریہ منڈا نے ضلع انتظامیہ سے مطالبہ کیا کہ اس پورے معاملے کی فوری طور پر غیر جانبدارانہ تحقیقات کی جائے، قصوروار اساتذہ اور متعلقہ اہلکاروں کے خلاف سخت کارروائی کی جائے اور ذمہ دار اہلکاروں کو ہٹایا جائے۔ انہوں نے محکمہ تعلیم کے افسران، اسکول انچارج اور عملہ سے ایمانداری اور احتساب کے ساتھ کام کرنے کی اپیل کرتے ہوئے کہا کہ بچوں کی صحت اور حقوق کے ساتھ کسی قسم کا سمجھوتہ برداشت نہیں کیا جائے گا۔
ہندوستھان سماچار
ہندوستان سماچار / محمد شہزاد
