جموں, یکم اگست (ہ س): جموں ۔ سرینگر قومی شاہراہ بند ہونے کے باعث مسافروں کی بڑھتی ہوئی بھیڑ کو کم کرنے کے لیے شمالی ریلوے نے بڈگام اور شری ماتا ویشنو دیوی کٹراکے درمیان خصوصی ٹرین چلانے کا اعلان کیا ہے۔ ریلوے حکام کے مطابق شاہراہ کی بندش کے سبب سری نگر اور کٹرا ریلوے اسٹیشنوں پر مسافروں کی غیر معمولی بھیڑ ہے، جس کے پیش نظر خصوصی ٹرین سروس شروع کی جا رہی ہے۔ حکام نے بتایا کہ خصوصی ٹرین دوپہر ایک بجے بڈگام ریلوے اسٹیشن سے روانہ ہوگی اور شام 4 بج کر 20 منٹ پر شری ماتا ویشنو دیوی کٹرا پہنچے گی۔ یہ ٹرین سرینگر، بانہال اور سنگلدان ریلوے اسٹیشنوں پر بھی رکے گی۔ واپسی میں ٹرین شام 5 بج کر 5 منٹ پر کٹراسے روانہ ہوگی اور رات 8 بج کر 30 منٹ پر بڈگام پہنچے گی۔شمالی ریلوے نے کہا ہے کہ اس خصوصی ٹرین کا مقصد قومی شاہراہ کی بندش کے باعث پھنسے ہوئے مسافروں کو سہولت فراہم کرنا اور ریلوے اسٹیشنوں پر بڑھتی ہوئی بھیڑ کو کم کرنا ہے۔

ہندوستھان سماچار

---------------

ہندوستان سماچار / محمد اصغر