نئی دہلی، یکم اگست(ہ س)۔ دہلی پولیس کی کرائم برانچ نے مغربی دہلی کے علاقے پچھم پوری میں فوڈ کارٹ چلانے والے ایک شخص پر تیز دھار ہتھیار سے قاتلانہ حملے کے مقدمے میں مفرور مرکزی ملزم کو تقریباً چھ ماہ بعد گرفتار کر لیا ہے۔ ملزم مسلسل اپنے ٹھکانے تبدیل کر کے پولیس کو چکمہ دے رہا تھا۔گرفتار ملزم کی شناخت دھیرج عرف جوڑی (24) کے طور پر ہوئی ہے، جو اتر پردیش کے ضلع علی گڑھ کا رہنے والا ہے اور اس وقت دہلی کے اَمن وہار علاقے میں کرائے کے مکان میں مقیم تھا۔ پولیس کے مطابق اس کے خلاف دہلی اور این سی آر کے مختلف تھانوں میں قتل کی کوشش، ڈکیتی، چوری، آرمز ایکٹ اور دیگر سنگین جرائم کے ایک درجن سے زائد مقدمات درج ہیں۔کرائم برانچ کے مطابق یہ کارروائی پنجابی باغ تھانے میں درج قتل کی کوشش کے مقدمے کے سلسلے میں کی گئی۔ ملزم کو بھارتیہ نیائے سنہتا (بی این ایس ایس )کی دفعہ 35(1)(C) کے تحت گرفتار کیا گیا۔ یہ کارروائی انسپکٹر رام پال کی قیادت میں اے سی پی اُمیش برتھوال کی نگرانی میں انجام دی گئی۔پولیس کے مطابق واقعہ 30 جنوری 2026 کی رات پیش آیا تھا، جب پچھم پوری میں دیپک نامی نوجوان اپنی فوڈ کارٹ پر موجود تھا۔ اسی دوران کئی حملہ آور وہاں پہنچے اور اس پر تیز دھار ہتھیار سے پے در پے حملے کر دیے، جس سے وہ شدید زخمی ہو گیا۔ اطلاع ملنے پر پولیس نے قتل کی کوشش سمیت مختلف دفعات کے تحت مقدمہ درج کر کے تحقیقات شروع کیں۔ تحقیقات میں معلوم ہوا کہ حملے میں دھیرج عرف جوڑی اپنے ساتھیوں کے ساتھ شامل تھا۔ مقامی پولیس پہلے ہی اس مقدمے میں رتک عرف مایا، امت، کرن، وشال اور برجو کو گرفتار کر چکی تھی، جبکہ دھیرج اور اس کے چند ساتھی فرار تھے۔ بعد ازاں کرائم برانچ نے بھی دو مطلوب ملزمان کو گرفتار کر لیا، تاہم دھیرج مسلسل قانون کی گرفت سے بچتا رہا۔کرائم برانچ نے بتایا کہ مفرور ملزمان کی تلاش کے دوران خفیہ اطلاع ملی کہ دھیرج کراری سلیمان نگر کے ایک نشہ مکتی مرکز میں چھپا ہوا ہے۔ اطلاع ملتے ہی پولیس ٹیم نے وہاں پہنچ کر گھیراؤ کیا اور مخبر کی نشاندہی پر ملزم کو فرار ہونے سے پہلے ہی گرفتار کر لیا۔ پوچھ گچھ کے دوران اس نے اپنی شناخت ظاہر کرتے ہوئے واردات میں ملوث ہونے کا اعتراف بھی کیا۔ہندوستھان سماچار

ہندوستان سماچار / Mohammad Khan