ایران کی ماہان ایئر اور پاسداران انقلاب کی معاونت کا الزام

واشنگٹن، 31 جولائی (ہ س)۔

امریکہ نے ایران کی پابندیوں کا سامنا کرنے والی ایئرلائن ماہان ایئر اور پاسداران انقلاب (آئی آر جی سی) کو مبینہ طور پر مالی، لاجسٹک اور تجارتی معاونت فراہم کرنے کے الزام میں بھارت، چین، روس اور ایران سے وابستہ ایک کثیر قومی نیٹ ورک پر نئی پابندیاں عائد کر دی ہیں۔

امریکی وزارتِ خزانہ کے دفتر برائے غیر ملکی اثاثہ جات کنٹرول (او ایف اے سی) نے چھ کمپنیوں اور افراد کو پابندیوں کی فہرست میں شامل کیا ہے۔ امریکی حکام کا الزام ہے کہ ان اداروں نے طویل عرصے سے امریکی پابندیوں کا سامنا کر رہی ایرانی ایئرلائن ماہان ایئر کی سرگرمیوں کو جاری رکھنے میں مدد فراہم کی۔

امریکی وزیر خزانہ اسکاٹ بیسنٹ نے کہا کہ جو افراد یا ادارے آئی آر جی سی یا ماہان ایئر کو مالی خدمات، لاجسٹک یا تجارتی تعاون فراہم کرتے ہیں، وہ ایک دہشت گرد تنظیم کی مدد کر رہے ہیں۔ انہوں نے کہا کہ امریکہ ایسے نیٹ ورکس کی نشاندہی کرکے انہیں امریکی مالیاتی نظام سے الگ کرنے کی کارروائی جاری رکھے گا۔

پابندیوں کی زد میں آنے والے نمایاں اداروں میں چین کی شنگھائی ونگز انٹرنیشنل لاجسٹکس کمپنی، شنگھائی ایلیٹ انٹرنیشنل ٹریول کمپنی اور ان کے منیجنگ ڈائریکٹر تانگ شین، بھارت کی اسکائز ٹریولز اینڈ لاجسٹکس پرائیویٹ لمیٹڈ، روس کی ایئر کارگو پرو لمیٹڈ اور ایران کی دادہ نگر اسٹارٹ اپ اسٹوڈیو شامل ہیں۔

امریکہ کا الزام ہے کہ بھارت میں قائم اسکائز ٹریولز اینڈ لاجسٹکس پرائیویٹ لمیٹڈ ماہان ایئر کی اہم تجارتی اور کسٹمر سپورٹ شراکت دار کے طور پر کام کر رہی تھی، جبکہ چین اور روس کی کمپنیاں ایئرلائن کو لاجسٹکس، کارگو اور دیگر تجارتی خدمات فراہم کر رہی تھیں۔

امریکی محکمہ خزانہ نے ایران کی ڈاڈے نگر اسٹارٹ اپ اسٹوڈیو کو آئی آر جی سی کی مبینہ فرنٹ کمپنی قرار دیا ہے۔ محکمے کے مطابق یہ ادارہ امریکی اور اسرائیلی تنصیبات سے متعلق معلومات اکٹھی کرکے ایرانی فوجی کارروائیوں کی منصوبہ بندی میں معاونت کرتا تھا۔

امریکہ نے یہ بھی خبردار کیا ہے کہ اگر کوئی غیر ملکی بینک یا مالیاتی ادارہ پابندیوں کی زد میں آنے والے اداروں کے ساتھ اہم مالی لین دین میں تعاون کرتا ہے تو اسے بھی ثانوی پابندیوں (سیکنڈری سینکشنز) کا سامنا کرنا پڑ سکتا ہے، جس سے امریکی مالیاتی نظام تک اس کی رسائی متاثر ہو سکتی ہے۔

امریکی محکمہ خارجہ نے دنیا بھر کی کمپنیوں سے اپیل کی ہے کہ وہ پابندیوں کا سامنا کرنے والی ایرانی ایئرلائنوں کے ساتھ اپنے تجارتی تعلقات پر نظرثانی کریں۔ محکمے نے کہا کہ واشنگٹن آئی آر جی سی کی معاونت کرنے والے نیٹ ورکس کے خلاف کارروائی جاری رکھے گا۔

ہندوستھان سماچار

ہندوستان سماچار / عطاءاللہ