نئی دہلی، 3 جولائی (ہ س)۔

بھارتیہ جنتا پارٹی کے قومی صدر نتن نوین ہفتہ سے شروع ہونے والے دو روزہ تنظیمی دورے پر اتر پردیش میں ہوں گے۔ اس دوران نتن نوین پارٹی کے سینئر لیڈروں اور عہدیداروں کے ساتھ تنظیمی میٹنگیں کریں گے۔ وہ بی جے پی کے عوامی نمائندوں، نیشنل ڈیموکریٹک الائنس کے قائدین اور مختلف شعبوں کی سرکردہ شخصیات سے بھی بات چیت کریں گے۔ پارٹی کے قومی صدر کا یہ دورہ بی جے پی کی حکمت عملی کو تیز کرنے اور اتر پردیش میں اگلے سال ہونے والے اسمبلی انتخابات کے پیش نظر نئی تشکیل شدہ ریاستی بی جے پی ٹیم کی رہنمائی کے لیے اہم ہے۔

جمعہ کو بی جے پی کی طرف سے جاری کردہ معلومات کے مطابق نتن نوین تنظیم کو مضبوط کرنے کے ساتھ شکتی کیندر کوآرڈینیٹر کانفرنس سے خطاب کریں گے۔ اتر پردیش بی جے پی کی نئی ٹیم کی تشکیل کے بعد قومی صدر کا ریاست کا یہ پہلا دورہ ہے۔

نتن نوین ہفتہ کی صبح 11 بجے لکھنو¿ کے چودھری چرن سنگھ بین الاقوامی ہوائی اڈے پر پہنچیں گے، جہاں پارٹی کارکنان ان کا استقبال کریں گے۔ وہ براہ راست ریاستی بی جے پی ہیڈکوارٹر جائیں گے، جو عالم باغ، شری ٹی این چترویدی چوک، چارباغ، دین دیال اسمرتیکا، مہارانا پرتاپ اسکوائر، اور برلنگٹن اسکوائر سے ہوتے ہوئے ایک عظیم الشان روڈ شو کی شکل اختیار کرے گا۔ دفتر میں، نتن نوین ریاستی بی جے پی عہدیداروں، علاقائی صدور، ریاستی محاذ کے صدور، اور ضلع صدور کے ساتھ ایک اہم تنظیمی میٹنگ کریں گے۔

سہ پہر 4:00 بجے بی جے پی صدر لکھنو¿ کے پرانے حیدرآباد کے مشہور شری ہنومان سیتو مندر میں پوجا کریں گے۔ اس کے بعد وہ اتر پردیش کے وزیر اعلیٰ، دونوں نائب وزیر اعلیٰ، بی جے پی کے اراکین پارلیمنٹ، ایم ایل ایز، اور قانون ساز کونسل کے اراکین سے ملاقات کریں گے۔ اس کے فوراً بعد وہ اتر پردیش بی جے پی کور کمیٹی کے ساتھ میٹنگ کریں گے۔ شام 7:45 بجے، قومی صدر پدم شری ایوارڈ یافتہ ڈاکٹر ودیا بندو سنگھ کی لکھنو¿ رہائش گاہ پر اتر پردیش کی اہم شخصیات سے ملاقات کریں گے۔ وہ وزیر اعلی یوگی آدتیہ ناتھ کے ساتھ رات کا کھانا کھائیں گے۔

اگلے دن، اتوار کو، قومی صدر اپنے دن کا آغاز اتر پردیش سے تعلق رکھنے والے بی جے پی کے سابق ریاستی صدور کے ساتھ چائے پر بات چیت سے کریں گے۔ اس کے فوراً بعد وہ صبح 9:30 بجے اتر پردیش کے این ڈی اے لیڈروں کے ساتھ مشترکہ میٹنگ کریں گے۔ قومی صدر نائب وزیر اعلیٰ کیشو پرساد موریہ اور نائب وزیر اعلیٰ برجیش پاٹھک کے ساتھ الگ الگ بات چیت کریں گے۔

ہندوستھان سماچار

ہندوستان سماچار / عطاءاللہ