نئی دہلی، 03 جولائی (ہ س)۔ لوک سبھا کے اسپیکر اوم برلا سمیت کئی لیڈروں نے پرم ویر چکر اعزاز یافتہ امر شہید کیپٹن منوج کمار پانڈے کو ان کے یوم شہادت پر خراج عقیدت پیش کیا، جنہوں نے کارگل جنگ میں اپنی جان کا نذرانہ پیش کیا۔
جمعہ کو ایکس پوسٹ پر کیپٹن منوج کمار پانڈے کو ان کے یوم شہادت پر خراج عقیدت پیش کرتے ہوئے، برلا نے کہا، ”کارگل تنازعہ کے دوران، انہوں نے بٹالک سیکٹر میں ہمت، قیادت اور قوم کے لیے لگن کا مظاہرہ کیا، مشکل حالات میں اپنے ساتھیوں کی قیادت کرتے ہوئے، انہوں نے مادر وطن کی حفاظت کے لیے عظیم قربانی دی، ہندوستانی تاریخ میں ان کی قربانیوں کو ہمیشہ یاد رکھا جائے گا۔ کیپٹن پانڈے کی زندگی اور قوم کے تئیں ان کی لگن آنے والی نسلوں کے لیے ہمیشہ تحریک کا ذریعہ رہے گی۔“
خراج عقیدت پیش کرتے ہوئے وزیر زراعت شیوراج سنگھ چوہان نے کہا کہ مادر ہند کے وقار کی حفاظت کے لیے اپنی جان قربان کرنے والے منوج کمار پانڈے جیسے بہادر بیٹے پر اس مٹی کے ہر ذرے کو ہمیشہ فخر رہے گا۔
مرکزی وزیر مملکت برائے قانون و انصاف (آزادانہ چارج) ارجن رام میگھوال نے کہا کہ منوج کمار پانڈے کی بے مثال بہادری، غیر متزلزل حب الوطنی اور عظیم قربانی ہر ہندوستانی کے لیے باعث ترغیب ہے۔ قوم ان کی بہادری اور قربانیوں کی ہمیشہ مقروض رہے گی۔
ٹیکسٹائل کے مرکزی وزیر گری راج سنگھ نے کیپٹن منوج کمار پانڈے کو ان کے یوم شہادت پر خراج عقیدت پیش کرتے ہوئے کہا کہ ملک کی خودمختاری اور سالمیت کے تحفظ کے لیے ان کی عظیم قربانی ہم سب کو ہمیشہ قوم کی خدمت کرنے کی ترغیب دیتی رہے گی۔
اتر پردیش کے وزیر اعلیٰ یوگی آدتیہ ناتھ نے خراج عقیدت پیش کرتے ہوئےکہا کہ مادر وطن کے تحفظ کے لیے ان کی عظیم قربانی اور بہادری ہمیشہ قوم کے لیے تحریک کا باعث رہے گی۔
دہلی کی وزیر اعلیٰ ریکھا گپتا نے کہا کہ ملک کے تحفظ اور سالمیت کے لیے دی گئی عظیم قربانی اور بے مثال ہمت ہمیشہ ہم وطنوں کو قوم کی خدمت کرنے اور فرض کے لیے وقف ہونے کی ترغیب دیتی رہے گی۔
راجستھان کے وزیر اعلی بھجن لال شرما اور مدھیہ پردیش کے وزیر اعلی موہن یادو نے بھی کیپٹن پانڈے کو ان کے یوم شہادت پر خراج عقیدت پیش کیا۔
عام آدمی پارٹی کے قومی کنوینر اروند کیجریوال نے کارگل جنگ کے امر شہید کو خراج عقیدت پیش کرتے ہوئے کہا کہ ان کی بے مثال ہمت اور عظیم قربانی ہمیشہ ملک کے ہر شہری کو متاثر کرتی رہے گی۔
قابل ذکر ہے کہ کیپٹن پانڈے کا یوم شہادت 3 جولائی کو منایا جاتا ہے۔ وہ 1999 کی کارگل جنگ (آپریشن وجے) کے دوران بٹالک سیکٹر میں کھلوبر چوٹی کو پاکستانی دراندازوں سے آزاد کرواتے ہوئے 3 جولائی 1999 کو شہید ہو گئے۔
ہندوستھان سماچار
ہندوستان سماچار / محمد شہزاد
