جبل پور میں دیر رات نازیہ خان پر ایم پی میں پہلی ایف آئی آر، زبردست مخالفت کے بعد زیرو پر قائمی ہوئی

جبل پور، 03 جولائی (ہ س)۔ خود کو ’سناتنی مسلم‘ بتانے والی سوشل میڈیا انفلوئنسر نازیہ الٰہی خان کے خلاف جبل پور کے ہنومان تال تھانے میں مدھیہ پردیش کی پہلی زیرو ایف آئی آر درج کی گئی ہے۔ پیغمبر محمد صلی اللہ علیہ وسلم پر مبینہ قابلِ اعتراض تبصرے کو لے کر مسلمانوں اور وکلاء میں لگاتار ناراضگی کا اظہار کیا جا رہا تھا۔ اس سے قبل شہر کے کئی تھانوں میں مسلمانوں کی جانب سے مظاہرہ کیا گیا تھا۔ اس کے ساتھ ہی ضلع ایڈوکیٹ ایسوسی ایشن کی قیادت میں بڑی تعداد میں وکیلوں نے پولیس سپرنٹنڈنٹ (ایس پی) کے دفتر پہنچ کر احتجاج کیا تھا۔ اس کے بعد ایس پی سمپت اپادھیائے کی ہدایت پر ہنومان تال تھانہ پولیس نے دیر رات معاملہ درج کیا۔

واضح رہے کہ نازیہ الٰہی خان کے خلاف مبینہ متنازعہ تبصرے کو لے کر ممبئی، بھیونڈی، کلیان، بریلی اور مرادآباد سمیت ملک کے کئی شہروں میں بھی مقدمات درج ہونے کی معلومات سامنے آئی ہیں۔ تنازعہ بڑھنے کے بعد بھارتیہ جنتا پارٹی نے بھی واضح کیا ہے کہ نازیہ کا پارٹی سے کوئی تعلق نہیں ہے، جبکہ وہ سوشل میڈیا پر خود کو بی جے پی اقلیتی مورچہ سے وابستہ بتاتی رہی ہیں۔ وہیں نازیہ الٰہی خان نے اپنے دفاع میں کہا ہے کہ ان کے نام سے وائرل ہو رہی ویڈیو اے آئی کی مدد سے تیار کی گئی ہے اور اس میں کہی گئی باتیں اس کی نہیں ہیں۔

جبل پور کے پولیس حکام کے مطابق، مبینہ واقعہ مدھیہ پردیش کے دائرۂ اختیار کا نہیں ہے، اس لیے ضابطے کے مطابق زیرو ایف آئی آر درج کر کے کیس کو آگے کی کارروائی کے لیے متعلقہ ریاست کی پولیس کو بھیجا جائے گا۔ مہاکوشل لا ایسوسی ایشن کے صدر ایڈوکیٹ انکور چودھری نے بتایا کہ چار دن پہلے ہنومان تال تھانے میں شکایت دی گئی تھی، لیکن کارروائی نہیں ہونے پر وکلاء نے ایس پی دفتر کا گھیراو کیا۔ ان کا کہنا ہے کہ احتجاج کے بعد دیر رات ایف آئی آر درج کی گئی۔

فی الحال جبل پور پولیس نے بھارتیہ نیائے سنہتا (بی این ایس) کی متعلقہ دفعات کے تحت زیرو ایف آئی آر درج کر کے قانونی کارروائی شروع کر دی ہے۔ معاملے کی مزید جانچ متعلقہ علاقے کی پولیس کی جانب سے کی جائے گی۔

ہندوستھان سماچار

---------------

ہندوستان سماچار / انظر حسن