کاراکاس، 02 جولائی (ہ س)۔ وینیزویلا میں دن گزرنے کے ساتھ ساتھ زلزلے کی تباہ کاریوں میں ہلاک ہونے والوں کی بڑھتی ہوئی تعداد خوفناک ہوتی جا رہی ہے۔ اقوامِ متحدہ نے تو یہ تعداد 10,000 تک پہنچنے کا خدشہ ظاہر کیا ہے۔ نیشنل اسمبلی کے صدر جارج روڈریگیز کے مطابق، وینیزویلا میں آنے والے دوہرے زلزلے میں مرنے والوں کی تعداد بڑھ کر 2,295 ہو گئی ہے۔ روڈریگیز نے سرکاری ٹیلی ویژن پر بتایا کہ ہزاروں دیگر لوگ زخمی بھی ہوئے ہیں۔

اسکائی نیوز کی رپورٹ میں جارج روڈریگیز اور اقوامِ متحدہ کے مقامی کوآرڈینیٹر جیانلوکا ریمپولا ڈیل ٹنڈارو کے حوالے سے یہ معلومات دی گئی ہے۔ وینیزویلا میں 24 جون کو آنے والے 7.2 اور 7.5 شدت کے دوہرے زلزلے کے بعد ہندوستان سمیت دنیا بھر کے بڑے ممالک نے مدد کے لیے ہاتھ بڑھائے ہیں۔ ٹنڈارو نے تسلیم کیا کہ اقوامِ متحدہ نے 10,000 باڈی بیگز منگوائے ہیں۔ ایک نیوز ویب سائٹ کے مطابق، 43,000 سے زیادہ لوگ لاپتہ بتائے جا رہے ہیں۔ روڈریگیز کے مطابق، 15,866 لوگ بے گھر ہو گئے ہیں۔

ناسا کے اندازے کے مطابق، 59.000 عمارتیں تباہ یا متاثر ہوئی ہیں۔ اس وقت بچاو کارکن ملبے میں زندہ بچے لوگوں اور دیگر متاثرین کی تلاش کر رہے ہیں۔ ایک امریکی جنرل نے بتایا کہ امدادی کاموں میں مدد کے لیے وینیزویلا، پورٹو ریکو اور کیوراساو میں 1,700 امریکی اہلکاروں کو تعینات کیا گیا ہے۔ امدادی گروپوں نے انتباہ دیا ہے کہ پہلے سے ہی کمزور ہیلتھ کیئر سسٹم پر شدید دباو ہے۔ ورلڈ فوڈ پروگرام نے 500,000 لوگوں کو ہنگامی غذائی امداد فراہم کرنے کے لیے 5 کروڑ ڈالر کی مدد کی اپیل کی ہے۔

سرکاری حکام کے مطابق، 24 جون کے دوہرے زلزلے کے بعد وینیزویلا میں تقریباً 782 آفٹر شاکس (زلزلے کے بعد کے جھٹکے) درج کیے گئے۔ ابھی زلزلہ متاثرہ علاقوں میں ملبے کو پوری طرح سے ہٹایا نہیں جا سکا ہے۔ المیہ یہ بھی ہے کہ وینیزویلا دنیا کے سب سے بڑے تیل کے ذخائر والے ممالک میں سے ایک ہے، لیکن ملک میں آئے دوہرے زلزلے کی وجہ سے ایندھن کا شدید بحران پیدا ہو گیا ہے۔ اس کے باعث امدادی اور بچاو مہم بھی سست رفتار سے چل رہی ہے۔ بھاری مشینری چلانے کے لیے پٹرول نہیں مل رہا۔ عوام کو اپنے رشتہ داروں اور دوستوں کو ڈھونڈنے کے لیے اپنے ہاتھوں سے ملبہ ہٹانے پر مجبور ہونا پڑ رہا ہے۔

ہندوستھان سماچار

---------------

ہندوستان سماچار / انظر حسن