انگل ووڈ (کیلیفورنیا)، 02 جولائی (ہ س)۔ اسپین کے ہیڈ کوچ لوئیس ڈی لا فوئنٹے نے بدھ کو کہا کہ نوجوان اسٹار لامین یامل اب مکمل طور پر فٹ ہیں اور فیفا ورلڈ کپ 2026 کے ناک آؤٹ مقابلوں میں ضرورت پڑنے پر پورے 90 منٹ کھیلنے کے لیے تیار ہیں۔

18 سالہ بارسلونا ونگر ہیم اسٹرنگ انجری سے صحت یاب ہونے کے بعد ورلڈ کپ کے گروپ مرحلے میں صرف 141 منٹ ہی کھیل سکے اور تین میچوں میں ایک گول کیا۔ ان کی فٹنس کو مدنظر رکھتے ہوئے اسپینی ٹیم انتظامیہ نے ان کے کھیلنے کے وقت کو محدود رکھا تھا۔

آسٹریا کے خلاف راؤنڈ آف 32 کے مقابلے سے قبل صحافیوں سے گفتگو کرتے ہوئے ڈی لا فوئنٹے نے کہا کہ یامال اب مکمل طور پر صحت یاب ہیں۔

انہوں نے کہا، لامین اتنا وقت کھیلنے کے لیے تیار ہیں جتنا ہم چاہیں گے۔ ہم نے ان کی ریکوری کے معاملے میں احتیاط برتی تھی، لیکن اب وہ مکمل طور پر فٹ ہیں۔ سب سے اہم بات یہ ہے کہ وہ خود بھی میدان میں اترنے کے لیے بے حد پُرجوش ہیں۔

کوچ نے مسکراتے ہوئے کہا، دیکھتے ہیں کہ وہ کل کھیلتے ہیں یا نہیں۔

یامل نے اس سیزن بارسلونا کے لیے تمام مقابلوں میں 24 گول کیے اور 17 اسسٹ دیے تھے، لیکن اپریل میں ہیم اسٹرنگ انجری کے باعث لا لیگا کے آخری چھ مقابلوں میں حصہ نہیں لے سکے تھے۔

ورلڈ کپ میں انہوں نے کیپ ورڈے کے خلاف پہلے میچ میں متبادل کھلاڑی کے طور پر میدان میں قدم رکھا تھا۔ اس کے بعد سعودی عرب کے خلاف اپنے پہلے ابتدائی میچ میں گول کیا اور یوراگوئے کے خلاف 76 منٹ تک کھیلتے رہے۔

اسپین کو دیگر کھلاڑیوں کی فٹنس سے بھی راحت

اسپین کے لیے ایک اور اچھی خبر یہ ہے کہ ونگر یریمی پینو کندھے کی انجری سے صحت یاب ہو چکے ہیں اور آسٹریا کے خلاف انتخاب کے لیے دستیاب ہوں گے۔

دوسری جانب لیورپول سے وابستہ ونگر وکٹر مونیوز بھی پٹھوں کی انجری سے صحت یاب ہو گئے ہیں، تاہم طویل وقفے کے بعد واپسی کے باعث ان کی شرکت کا حتمی فیصلہ میچ کی صورتحال کو دیکھتے ہوئے کیا جائے گا۔

نیکو ولیمز ابھی آسٹریا کے خلاف نہیں کھیلیں گے، تاہم ان کی گروئن انجری میں بہتری آئی ہے اور اگر اسپین اگلے مرحلے میں پہنچتا ہے تو ان کے دستیاب ہونے کا امکان ہے۔

اسپین نے ورلڈ کپ 2026 کے گروپ مرحلے میں شاندار کارکردگی کا مظاہرہ کرتے ہوئے مسلسل تین میچوں میں ایک بھی گول نہیں کھایا اور کلین شیٹ کے ساتھ ناک آؤٹ مرحلے میں جگہ بنائی ہے۔ ٹیم جمعرات کو راؤنڈ آف 32 میں آسٹریا کا مقابلہ کرے گی۔

ہندوستھان سماچار

---------------

ہندوستان سماچار / عبدالواحد