نئی دہلی، 02 جولائی (ہ س): میونسپل کمشنر سنجیو کھیروار نے جمعرات کو سول لائنز علاقے کے تحت آدرش نگر وارڈ کا معائنہ کیا اور مانسون کی تیاریوں کا جائزہ لیا۔

سنجیو کھیروار نے پی ڈبلیو ڈی کے افسران کو ہدایت دی کہ وہ آدرش نگر میٹرو اسٹیشن کے قریب نالوں کو صاف کریں۔ میونسپل کمشنر نے آدرش نگر میٹرو اسٹیشن کے قریب مرغامنڈی میں غیر قانونی لائسنس کے تحت چلنے والی دکانوں کے خلاف کارروائی کی ہدایت دی۔ انہوں نے لہسن اور پیاز کے چھلکوں کو وارڈ میں چھانٹ کر نالیوں میں پھینکنے والوں کے خلاف سخت کارروائی کی ہدایت کی اور ان چھلکوں کو نالیوں سے نکالنے کا حکم دیا۔

میونسپل کمشنر نے آدرش نگر میٹرو اسٹیشن کے قریب مین روڈ پر پڑے کچرے پر سخت اعتراض ظاہر کیا اور وہاں اضافی ڈسٹ بن لگانے کا حکم دیا۔ انہوں نے کہا کہ کوڑے دان اس انداز میں رکھے جائیں کہ ٹریفک کی روانی میں رکاوٹ نہ آئے۔ کھیروار نے عہدیداروں کو ہدایت دی کہ وہ اس بات کو یقینی بنائیں کہ مرکزی سڑکوں پر کچرا نہ پڑے۔

سنجیو کھیروار نے جہانگیر پوری ایچ بلاک میں پی ڈبلیو ڈی پمپ اسٹیشن اور شاہ عالم بند روڈ پر نالے کا بھی معائنہ کیا۔ انہوں نے مجلس پارک میٹرو اسٹیشن پر نالے اور جہانگیرپوری جی بلاک میں نالے پر جاری صفائی کے کام کا معائنہ کیا اور اسے جلد از جلد مکمل کرنے کی ہدایت کی۔ انہوں نے یہ بھی ہدایت کی کہ نالوں سے نکالی گئی گاد کو جلد از جلد ہٹایا جائے۔

میونسپل کمشنر نے عہدیداروں کے ساتھ مانسون کی بارش کے دوران پانی جمع ہونے سے نمٹنے کے لیے آدرش نگر وارڈ میں ایک اضافی پمپنگ اسٹیشن بنانے کے ایکشن پلان پر بھی تبادلہ خیال کیا۔

معائنہ کے دوران محکمہ پی ڈبلیو ڈی کے افسران، آدرش نگر کے ایم ایل اے راج کمار بھاٹیہ، میونسپل کونسلر مکیش گوئل، سول لائنز ایریا کے ڈپٹی کمشنر ششی پرتاپ سنگھ، چیف انجینئر پی سی۔ مینا اور دہلی میونسپل کارپوریشن کے سینئر افسران موجود تھے۔

---------------

ہندوستان سماچار / عبدالسلام صدیقی