ممبئی ، 2 جولائی (ہ س) ۔ مہاراشٹر میں مسلسل موسلا دھار بارش کے پیش نظر ریاستی ڈیزاسٹر مینجمنٹ محکمہ نے شدید بارش کا الرٹ جاری کرتے ہوئے شہریوں سے غیر ضروری طور پر گھروں سے باہر نہ نکلنے کی اپیل کی ہے۔ ریاستی وزیر برائے ڈیزاسٹر مینجمنٹ گریش مہاجن نے کہا کہ آئندہ چند دنوں میں ریاست کے بعض اضلاع میں بارش کی شدت مزید بڑھنے کا امکان ہے، جس کے پیش نظر تمام اضلاع میں ہنگامی نظام کو مکمل طور پر الرٹ کر دیا گیا ہے اور متعلقہ محکموں کو ہر ممکن صورتحال سے نمٹنے کی ہدایت دی گئی ہے۔گریش مہاجن نے جمعرات کو منترالیہ میں قائم ریاستی ایمرجنسی کنٹرول روم کا دورہ کیا، جہاں انہوں نے انتظامات کا جائزہ لیا اور افسران و ملازمین سے بات چیت کی۔ انہوں نے تمام سرکاری اداروں کو چوبیس گھنٹے الرٹ رہنے اور کسی بھی ہنگامی صورتحال سے فوری نمٹنے کی ہدایت دی۔ انہوں نے بتایا کہ گزشتہ چند دنوں سے ریاست بھر میں بارش میں نمایاں اضافہ ہوا ہے، جس کے باعث کئی علاقوں میں ندیاں اور نالے خطرے کے نشان کے قریب یا اس سے اوپر بہہ رہے ہیں۔ مون سون کے دوران ممکنہ قدرتی آفات سے نمٹنے کے لیے ریاستی ڈیزاسٹر مینجمنٹ محکمہ اور تمام ضلعی ایمرجنسی نظام کو مکمل طور پر فعال رکھا گیا ہے، جبکہ تمام ڈیزاسٹر کنٹرول روم چوبیس گھنٹے کام کر رہے ہیں۔وزیر نے کہا کہ محکمہ موسمیات نے 3 سے 5 جولائی کے درمیان ریاست کے مختلف حصوں میں شدید بارش کی پیش گوئی کی ہے۔ اس لیے شہری صرف انتہائی ضروری صورت میں ہی گھروں سے باہر نکلیں، نشیبی علاقوں سے گریز کریں اور انتظامیہ کی جانب سے جاری تمام ہدایات پر سختی سے عمل کریں۔ انہوں نے کہا کہ ریاستی حکومت اور ضلعی انتظامیہ عوام کے جان و مال کے تحفظ کے لیے ہر ممکن اقدامات کر رہی ہے، تاہم ہر شہری کی یہ بھی ذمہ داری ہے کہ وہ اپنی اور اپنے اہل خانہ کی حفاظت کو ترجیح دیتے ہوئے احتیاطی تدابیر اختیار کرے۔گریش مہاجن نے بتایا کہ مسلسل بارش کے باعث ممبئی کے بعض علاقوں میں پانی جمع ہونے کے واقعات پیش آئے تھے، تاہم متعلقہ اداروں کی بروقت کارروائی کے نتیجے میں صورتحال اس وقت قابو میں ہے اور بیشتر علاقوں میں معمولات زندگی بحال ہو چکے ہیں۔ انہوں نے کہا کہ ممبئی میونسپل کارپوریشن اور دیگر متعلقہ اداروں کے ساتھ مسلسل رابطہ برقرار رکھا جا رہا ہے اور صورتحال پر گہری نظر رکھی جا رہی ہے۔ ٹریفک کی روانی بہتر بنانے کے لیے بھی میونسپل انتظامیہ کو ضروری ہدایات جاری کی گئی ہیں۔وزیر نے بتایا کہ ہنگامی حالات میں عوام کی مدد کے لیے ریاستی ڈیزاسٹر کنٹرول روم کی چوبیس گھنٹے ہیلپ لائن خدمات جاری ہیں۔ شہری کسی بھی ایمرجنسی کی صورت میں 1070، 09321587143، 02222027990 اور 02222794229 پر رابطہ کر سکتے ہیں، جبکہ ضلعی سطح پر ہیلپ لائن نمبر 1077 دستیاب ہے۔اس موقع پر محکمہ ڈیزاسٹر مینجمنٹ کی پرنسپل سیکریٹری ونیتا سنگھل اور ڈائریکٹر ڈاکٹر بھال چندر چوہان سمیت دیگر اعلیٰ افسران بھی موجود تھے۔

ہندوستھان سماچار

--------------------

ہندوستان سماچار / جاوید این اے