ممبئی ، 2 جولائی (ہ س) ہوم ٹیکسٹائل، ہوم ڈیکور، گھریلو مصنوعات اور تحائف سے متعلق بھارت کی سب سے بڑی سالانہ تجارتی نمائش (ایچ جی ایچ انڈیا) کے انیسویں ایڈیشن کا ممبئی کے نیسکو میں واقع بمبئی ایگزیبیشن سینٹر کے ہال نمبر 6 میں باضابطہ افتتاح کیا گیا۔ چار روزہ اس بین الاقوامی نمائش کو صنعت، حکومت اور ڈیزائن کے شعبے سے وابستہ ممتاز شخصیات اور تجارتی خریداروں کی بھرپور شرکت حاصل ہوئی۔ اس سال نمائش میں بھارت اور بیرون ملک کے 700 سے زائد برانڈز اور مینوفیکچررز شریک ہیں، جبکہ ملک اور بیرون ملک سے 50 ہزار سے زیادہ تجارتی خریداروں کی آمد متوقع ہے۔

افتتاحی تقریب میں بھارت کی وزارت ٹیکسٹائل کی ٹیکسٹائل کمشنر ورندا منوہر دیسائی نے بطور مہمان خصوصی شرکت کی۔ تقریب میں اٹلی کے قونصل جنرل والٹر فیرارا، مہاراشٹر اسمال اسکیل انڈسٹریز ڈیولپمنٹ کارپوریشن کے منیجنگ ڈائریکٹر وکاس پانسرے، آئی آئی آئی ڈی ایم آر سی کے صدر کیتن شیٹھ، معروف معمار رضا کابل، راجیو کسات اور مکرند پاٹسکر بھی بطور معزز مہمان موجود تھے۔ پروگرام کی میزبانی ٹیکس زون انفارمیشن سروسز پرائیویٹ لمیٹڈ کے منیجنگ ڈائریکٹر ارون رنگٹا اور ایکسپو پلس کنسلٹنگ ایسوسی ایٹس لمیٹڈ کے ڈائریکٹر ڈاکٹر گیرٹ بوٹگر نے کی۔

ارون رنگٹا نے کہا کہ ایچ جی ایچ انڈیا کا مقصد بھارتی ہوم انڈسٹری کو عالمی معیار کا تجارتی پلیٹ فارم فراہم کرنا ہے۔ انہوں نے کہا کہ نمائش کا انیسواں ایڈیشن ڈیزائن، پائیداری اور عالمی وژن کے میدان میں صنعت کی تیز رفتار ترقی کی عکاسی کرتا ہے۔ ان کے مطابق 700 سے زائد برانڈز، ہزاروں تجارتی خریداروں اور سرکاری و ڈیزائن شعبے کی ممتاز شخصیات کی موجودگی اس صنعت کے روشن مستقبل کا ثبوت ہے اور آئندہ چار دنوں میں کاروباری معاہدوں اور نئی اختراعات کے تبادلے کے بہترین مواقع پیدا ہوں گے۔

ٹیکسٹائل کمشنر ورندا منوہر دیسائی نے کہا کہ صنعت میں جدت، پائیداری اور اعلیٰ معیار کے ڈیزائن پر بڑھتی ہوئی توجہ نہایت حوصلہ افزا ہے۔ ان کے مطابق پائیداری اب صرف ایک تصور نہیں بلکہ کاروباری حکمت عملی کا لازمی حصہ بن چکی ہے۔ انہوں نے کہا کہ ہوم ٹیکسٹائل ویلیو چین میں پائیدار مصنوعات، سرکولر اکانومی اور ٹریس ایبلٹی پر خصوصی توجہ دی جا رہی ہے، جبکہ ایچ جی ایچ انڈیا مینوفیکچررز، خریداروں اور ڈیزائنرز کو ایک ہی پلیٹ فارم پر لا کر صنعت کی ترقی اور بامعنی اشتراک کو فروغ دیتا ہے۔

اٹلی کے قونصل جنرل والٹر فیرارا نے کہا کہ بھارت دنیا کی تیزی سے ترقی کرتی ہوئی اہم منڈیوں میں شامل ہے جہاں اعلیٰ معیار کی ہوم فرنشنگ، ڈیکور اور ڈیزائن پر مبنی مصنوعات کی مانگ مسلسل بڑھ رہی ہے۔ انہوں نے کہا کہ بھارت اور اٹلی دونوں ممالک اعلیٰ دستکاری، معیار اور جدت کی مشترکہ روایات رکھتے ہیں، جس کے باعث دونوں ممالک کے درمیان صنعتی تعاون کے وسیع امکانات موجود ہیں۔ انہوں نے بتایا کہ ایچ جی ایچ انڈیا میں قائم اطالوی پویلین میں پانچ ممتاز اطالوی برانڈز اپنی مصنوعات پیش کر رہے ہیں، جو اٹلی کے ڈیزائن، تخلیقی صلاحیت، پائیداری اور دستکاری کی بہترین مثال ہیں۔

نمائش کے منتظمین کے مطابق ایچ جی ایچ انڈیا کا انیسواں ایڈیشن تین بنیادی تصورات پر مرکوز ہے۔ ٹیکس زون، جو مارکیٹ ڈیولپمنٹ، ٹرینڈ فورکاسٹنگ، معلومات کے تبادلے اور مصنوعات سے متعلق خدمات میں چار دہائیوں سے زائد کا تجربہ رکھتا ہے، اس نمائش کے ذریعے بھارتی ہوم انڈسٹری کو عالمی سطح پر مزید مضبوط مقام دلانے کی کوشش کر رہا ہے۔ منتظمین کا کہنا ہے کہ یہ نمائش نہ صرف کاروباری سرگرمیوں کو فروغ دے گی بلکہ مستقبل کی نئی ٹیکنالوجی، جدید ڈیزائن اور پائیدار ترقی کے رجحانات کو بھی ایک ہی پلیٹ فارم پر متعارف کرائے گی۔

ہندوستھان سماچار

--------------------

---------------

ہندوستان سماچار / جاوید این اے