جموں, 02 جولائی (ہ س)۔ امرناتھ یاترا کے لیے جموں پہنچنے والے عقیدت مندوں کی سہولت کے پیش نظر جموں ریلوے اسٹیشن سے بھگوتی نگر بیس کیمپ تک مفت بس اور ٹیکسی سروس کا آغاز کر دیا گیا ہے۔ یہ سہولت آل جموں و کشمیر ٹرانسپورٹ ویلفیئر ایسوسی ایشن اور ٹیکسی آپریٹرز یونین کی جانب سے یاترا کے دوران فراہم کی جائے گی۔مفت سروس کا افتتاح ٹرانسپورٹ کمشنر ویشیش پال مہاجن نے دیگر حکام کی موجودگی میں کیا۔ اس موقع پر انہوں نے کہا کہ یاتریوں سے من مانا کرایہ وصول کرنے کی شکایات موصول ہو رہی ہیں، جو مناسب نہیں۔ انہوں نے ٹرانسپورٹ سے وابستہ افراد پر زور دیا کہ وہ ’’اتھیتی دیوو بھو‘‘ کے جذبے کے تحت یاتریوں کی خدمت کریں۔

حکام کے مطابق جموں ریلوے اسٹیشن سے روزانہ صبح پانچ بجے سے رات نو بجے تک دو منی بسیں مفت چلائی جائیں گی، جو یاتریوں کو بھگوتی نگر بیس کیمپ تک پہنچائیں گی۔ یہ سروس شری امرناتھ یاترا کے اختتام تک جاری رہے گی۔ادھر جموں ریلوے اسٹیشن ٹیکسی آپریٹرز یونین نے بھی امرناتھ یاتریوں کے لیے دس مفت ٹیکسیاں فراہم کرنے کا اعلان کیا ہے۔ یونین کے صدر دیویندر چودھری کے مطابق یہ ٹیکسیاں چوبیس گھنٹے دستیاب رہیں گی اور یاتری یونین سے رابطہ کرکے اس سہولت سے فائدہ اٹھا سکیں گے۔آل جموں و کشمیر ٹرانسپورٹ ویلفیئر ایسوسی ایشن کے صدر وجے سنگھ چِب نے کہا کہ یاتریوں کی آسانی کو مدنظر رکھتے ہوئے یہ فیصلہ چند روز قبل لیا گیا تھا، جس پر اب عمل درآمد شروع کر دیا گیا ہے۔

ہندوستھان سماچار

---------------

ہندوستان سماچار / محمد اصغر