نئی دہلی، 17 جولائی (ہ س)۔فیفا عالمی کپ2026کے سیمی فائنل میں ارجینٹیناسے شکست کھاکر ٹورنامنٹ سے باہر ہونے کے بعد انگلینڈ کے اسٹار فٹ بالر جوڈ بیلنگھم نے اپنے مداحوں کے لیے ایک جذباتی پیغام شیئر کیاہے۔ انہوں نے پورے ٹورنامنٹ میں ملنے والی زبردست حمایت کے لیے ٹیم کا شکریہ ادا کیا اور ان پر زور دیا کہ وہ متحد رہیں۔ریئل میڈرڈ کے مڈفیلڈر بیلنگھم نے جمعہ کے روز انسٹاگرام پر لکھا کہ انہیں سیمی فائنل میں شکست کے بعد اپنے جذبات کو الفاظ میں بیان کرنا مشکل ہوگیا لیکن مداحوں کی محبت اور حمایت ان کے لیے بہت خاص تھی۔بیلنگھم نے اپنے پیغام میں لکھا، ’ میرے لیے کل اور گزشتہ چند ہفتوں کو بیان کرنے کے لیے صحیح الفاظ تلاش کرنا بہت مشکل تھا۔ ‘لیکن ہمارے ڈرائیور نے جو کچھ کہا اس نے میرے جذبات کا بالکل خلاصہ کیا۔ میں انگلینڈ میں ہر ایک کا اور ان شائقین کا تہہ دل سے شکریہ ادا کرتا ہوں جنہوں نے امریکہ آنے اور ہماری حمایت کے لیے اپنی محنت کی کمائی خرچ کی۔انہوں نے مزید کہا،’ اس مہم کے ساتھ ہمارے ملک میں دکھائی جانے والی یکجہتی اور محبت ختم نہیں ہونی چاہیے۔ جب ہم ساتھ ہوتے ہیں تو بڑی کامیابیاں حاصل کرسکتے ہیں۔۔۔ اور ہم ضرور کریں گے۔ آپ سبھی سے پیار۔‘انگلینڈ کی ورلڈ کپ مہم سیمی فائنل میں دفاعی چمپئن ارجینٹیناکے ہاتھوں 2-1 سے شکست کے ساتھ ختم ہو گئی۔ انگلینڈ نے ابتدائی برتری حاصل کی لیکن ارجینٹیناکے اینزو فرنانڈیز نے گول کرکے برابری کر دی۔اس کے بعد اضافی وقت (اسٹاپج ٹائم) میں لاوٹارو مارٹینز نے فاتحانہ گول کر کے ارجینٹینا کو فائنل میں پہنچا دیا جبکہ انگلینڈ کا ایک بار پھر ورلڈ کپ جیتنے کا خواب ادھورا رہ گیا۔بیلنگھم کے پیغام کو سوشل میڈیا پر مداحوں کی جانب سے بڑے پیمانے پر پذیرائی ملی ہے۔ انگلینڈ کے نوجوان اسٹار نے یقین ظاہر کیا کہ اگر ٹیم اور شائقین اسی طرح متحد رہے تو مستقبل میں انگلینڈ مزید کامیابیاں حاصل کرے گا۔ہندوستھان سماچار

ہندوستان سماچار / Mohammad Khan