سلطان پور، 15 جولائی (ہ س): اتر پردیش کے ضلع سلطان پور کی ایم پی-ایم ایل اے خصوصی عدالت سے کانگریس رہنما اور لوک سبھا میں قائدِ حزبِ اختلاف راہل گاندھی کو بڑی راحت ملی ہے۔ بی جے پی رہنما اور مرکزی وزیر داخلہ امت شاہ کے خلاف مبینہ قابلِ اعتراض بیان سے متعلق زیرِ سماعت ہتکِ عزت کے مقدمے میں راہل گاندھی کے وائس سیمپل کی فارنسک جانچ کرانے کی درخواست والی ریویژن (نگرانی) عرضی کو عدالت نے مسترد کر دیا ہے۔

راہل گاندھی کے وکیل کاشی پرساد شکلا نے بتایا کہ ایم پی-ایم ایل اے کورٹ نمبر 5 میں اس معاملے سے متعلق ایک ریویژن عرضی زیرِ غور تھی، جسے مدعی وجے مشرا کی جانب سے دائر کیا گیا تھا۔ عدالت نے اس عرضی کو خارج کر دیا۔

یہ درخواست اس مقصد سے دائر کی گئی تھی کہ مقدمے کی فائل میں موجود سی ڈی میں ریکارڈ شدہ آواز کا راہل گاندھی کے وائس سیمپل سے فارنسک سائنس لیبارٹری (ایف ایس ایل) میں موازنہ کرایا جائے۔ عدالت نے قرار دیا کہ یہ درخواست بہت تاخیر سے دائر کی گئی، اس کی کوئی مضبوط بنیاد نہیں ہے اور یہ قانونی طور پر کمزور ہے۔ عدالت نے واضح کیا کہ ماتحت عدالت نے اپنے صوابدیدی اختیارات کا درست استعمال کیا ہے اور اس میں مداخلت کی کوئی ضرورت نہیں۔

اب اس مقدمے کی اصل فائل پر آئندہ سماعت 18 جولائی 2026 کو ہوگی، جس میں ضابطے کے مطابق دلائل سنے جائیں گے۔

مدعی وجے مشرا کے وکیل سنتوش پانڈے نے عدالت کے فیصلے پر ردِعمل ظاہر کرتے ہوئے کہا کہ وہ اس فیصلے کا احترام کرتے ہیں، تاہم اس سے مطمئن نہیں ہیں۔ انہوں نے بتایا کہ اس سے قبل مجسٹریٹ عدالت نے بھی وائس سیمپل کی جانچ کی درخواست مسترد کر دی تھی، جس کے خلاف انہوں نے ریویژن عرضی دائر کی تھی، لیکن آج ضلع جج کی عدالت نے بھی اسے خارج کر دیا۔ انہوں نے کہا کہ وہ اس حکم کے خلاف الہ آباد ہائی کورٹ سے رجوع کریں گے اور وہاں اس فیصلے کو چیلنج کریں گے۔

قابلِ ذکر ہے کہ 2018 میں کرناٹک اسمبلی انتخابات کے دوران راہل گاندھی نے امت شاہ کے بارے میں مبینہ طور پر قابلِ اعتراض بیان دیا تھا۔ اس بیان سے خود کو متاثر قرار دیتے ہوئے سلطان پور کے بی جے پی رہنما وجے مشرا نے ایم پی-ایم ایل اے عدالت میں ہتکِ عزت کا مقدمہ دائر کیا تھا۔

عدالت کی جانب سے وارنٹ جاری ہونے کے بعد راہل گاندھی پہلی مرتبہ 20 فروری 2024 کو عدالت میں پیش ہوئے تھے، جہاں انہیں 25-25 ہزار روپے کے دو مچلکوں پر ضمانت دے دی گئی تھی۔ اس کے بعد 26 جولائی 2024 کو انہوں نے عدالت میں اپنا بیان ریکارڈ کرایا، جبکہ آخری بار 20 فروری 2026 کو وہ اپنا مؤقف پیش کرنے کے لیے عدالت میں حاضر ہوئے تھے۔

ہندوستھان سماچار

---------------

ہندوستان سماچار / عبدالواحد