جموں کے بھگوتی نگر بیس کیمپ سے تیرتھ یاتریوں کا جتھہ وادی کے لئے روانہ

جموں، 15 جولائی (ہ س)۔ شری امرناتھ یاترا کا 14واں قافلہ بدھ کی علی الصبح سخت حفاظتی انتظامات کے درمیان بھگوتی نگر یاتری نیواس جموں سے کشمیر کے بالتل اور پہلگام بیس کیمپوں کے لیے روانہ ہوگیا۔ قافلے میں مجموعی طور پر 6,251 تیرتھ یاتری شامل ہیں۔ جوائنٹ پولیس کنٹرول روم کے مطابق 2,985 یاتری بالتل جبکہ 3,266 یاتری پہلگام راستے سے روانہ ہوئے۔ قافلے میں 230 گاڑیاں شامل ہیں جن میں 137 بسیں، 34 درمیانے درجے کی گاڑیاں اور 59 ہلکی موٹر گاڑیاں شامل ہیں۔

حکام کے مطابق یاتریوں میں 4,439 مرد، 1,614 خواتین، 13 بچے، 78 سادھو، 53 سادھویاں، ایک سادھو بچہ، تین خواجہ سرا اور 50 غیر ملکی مرد یاتری شامل ہیں۔ بالتل جانے والا قافلہ صبح 2 بج کر 42 منٹ پر جبکہ پہلگام جانے والا قافلہ صبح 3 بج کر 27 منٹ پر روانہ ہوا۔یاترا کے طے شدہ سفری منصوبے کے مطابق بالتل جانے والے یاتری بانہال کے لمبر گراؤنڈ لنگر میں ناشتے کے لیے قیام کریں گے، جبکہ پہلگام راستے سے جانے والے یاتری رام بن ضلع کے چندرکوٹ لنگر میں مختصر آرام اور ناشتے کے بعد اپنے سفر کو جاری رکھیں گے۔

حکام نے بتایا کہ رام بن ضلع میں مختلف لنگر مقامات پر یاتریوں کے لیے مفت کھانے، پینے کے پانی، طبی امداد اور دیگر سہولیات فراہم کی جا رہی ہیں، جبکہ جموں-سرینگر قومی شاہراہ پر یاتریوں کی محفوظ آمد و رفت کے لیے انتظامیہ، سیکورٹی فورسز اور ٹریفک پولیس کی جانب سے خصوصی انتظامات کیے گئے ہیں۔14 ویں قافلے کی روانگی کے ساتھ ہی رواں برس بھگوتی نگر یاتری نیواس سے شری امرناتھ گپھا کے لیے روانہ ہونے والے یاتریوں کی مجموعی تعداد 99 ہزار 287 تک پہنچ گئی ہے۔

ہندوستھان سماچار

---------------

ہندوستان سماچار / محمد اصغر