نوی ممبئی ، 15 جولائی (ہ س)۔ نوی ممبئی بین الاقوامی ہوائی اڈے سے بدھ کے روز بین الاقوامی فضائی خدمات کا باضابطہ آغاز ہوگیا۔ اس سلسلے میں ایئر انڈیا ایکسپریس نے ابوظہبی کے لیے اپنی پہلی بین الاقوامی پرواز روانہ کی، جس کے ساتھ ہی ہوائی اڈہ عالمی فضائی رابطوں کے نئے دور میں داخل ہوگیا۔ایئر انڈیا ایکسپریس کی پہلی بین الاقوامی پرواز تقریباً 100 مسافروں کو لے کر ہندوستانی وقت کے مطابق علی الصبح 2 بج کر 55 منٹ پر نوی ممبئی بین الاقوامی ہوائی اڈے سے روانہ ہوئی۔ تقریباً ڈھائی گھنٹے کے سفر کے بعد یہ طیارہ متحدہ عرب امارات کے ابوظہبی بین الاقوامی ہوائی اڈے پر بحفاظت پہنچ گیا۔ ایئر انڈیا ایکسپریس کے مطابق یہ پرواز بوئنگ 737 میکس 8 طیارے کے ذریعے چلائی گئی۔ روانگی سے قبل طیارے کے پائلٹ نے اس پرواز کو تاریخی اور انتہائی اہم قرار دیتے ہوئے کہا کہ یہ نوی ممبئی بین الاقوامی ہوائی اڈے کی عالمی فضائی خدمات کے آغاز کی علامت ہے۔اس پہلی بین الاقوامی پرواز کے ساتھ جلد خراب ہونے والی اشیا (پیریشیبل مصنوعات) کی پہلی بین الاقوامی کھیپ بھی بیرون ملک روانہ کی گئی، جسے تجارتی سرگرمیوں کے لیے ایک اہم پیش رفت قرار دیا جا رہا ہے۔ ایئر انڈیا ایکسپریس نے اعلان کیا ہے کہ وہ نوی ممبئی اور ابوظہبی کے درمیان ہفتے میں تین دن باقاعدہ پروازیں چلائے گی، جس سے مسافروں اور تجارتی شعبے دونوں کو فائدہ پہنچنے کی توقع ہے۔قابل ذکر ہے کہ نوی ممبئی بین الاقوامی ہوائی اڈے سے 25 دسمبر 2025 کو اندرونِ ملک فضائی خدمات کا آغاز کیا گیا تھا۔ اس ہوائی اڈے کی تعمیر و ترقی مختلف مراحل میں نوی ممبئی انٹرنیشنل ایئرپورٹ لمیٹڈ (این ایم آئی اے ایل) کے ذریعے کی جا رہی ہے، جو ایک خصوصی مقصدی ادارہ ہے۔ اس میں اے اے ایچ ایل کی 74 فیصد جبکہ سٹی اینڈ انڈسٹریل ڈیولپمنٹ کارپوریشن (سڈکو) کی 26 فیصد شراکت داری ہے۔ نوی ممبئی ہوائی اڈے سے بین الاقوامی خدمات کے آغاز کو ریاست مہاراشٹر کے فضائی رابطوں، تجارت اور سیاحت کے فروغ کی سمت میں ایک اہم سنگ میل قرار دیا جا رہا ہے۔ہندوستھان سماچار

ہندوستان سماچار / جاوید این اے