چنئی، 14 جولائی (ہ س). ویتنام میں ایک کشتی حادثے میں ہلاک ہونے والے تمل ناڈو کے دو افراد کی لاشوں کو منگل کی صبح چنئی ہوائی اڈے پر لایا گیا۔ ویلور سے تملگا ویتری کزگم (ٹی وی کے )کے ا یم ایل اے ونود کنن نے ترووناملائی کے رہنے والے روی شنکر اور ویلور کے رہنے والے ونے کمار کی لاشوں پر گلہائے عقیدت نذر کئے اور سوگوار خاندانوں کو تسلی دی۔
ایک موبائل فون کمپنی نے ویتنام میں اپنے ڈسٹریبیوٹرز کے لیے سیاحت اور کاروباری سفر کا اہتمام کیا تھا۔ شرکا کو کشتی کے ذریعے ایک جزیرے تک لے جایا جا رہا تھا۔ اس دوران کشتی الٹ گئی جس کے نتیجے میں 15 ہندوستانی ہلاک ہوگئے۔ مرنے والوں میں تمل ناڈو کے 10، آندھرا پردیش کے تین اور کیرالہ کے دو افراد شامل ہیں۔
حادثے کے بعد ویتنام میں ہندوستانی سفارت خانے نے مقامی انتظامیہ کے ساتھ مل کر لاشوں کو ہندوستان واپس لانے کے عمل کو تیز کردیا۔ تمل ناڈو حکومت نے بھی اپنے شہریوں کی لاشوں کی وطن واپسی کو تیز کرنے کے لیے خصوصی کوششیں شروع کیں۔ اس سلسلے میں ہفتہ کی رات سیلم رینج کے ڈی آئی جی سنتوش ہڈیمنی کو پورے عمل کی نگرانی کے لیے ویتنام روانہ کیا گیا۔
تمام 15 ہندوستانیوں کی لاشیں پیر کی رات ایک خصوصی طیارے کے ذریعے ممبئی کے ہوائی اڈے پر لائی گئیں۔ ضروری قانونی اور انتظامی ضابطے مکمل کرنے کے بعد لاشوں کو متعلقہ ریاستوں کے حکام کے حوالے کر دیا گیا۔ اس کے بعد تمل ناڈو سے 10 مرنے والوں کی لاشوں کو چنئی اور کوئمبٹور روانہ کیا گیا۔
پہلے مرحلے میں روی شنکر اور ونے کمار کی لاشیں منگل کی صبح انڈیگو ایئر لائنز کی پرواز سے چنئی پہنچیں۔ پرانے چنئی ہوائی اڈے کے کارگو کمپلیکس میں انڈیگو ٹرمینل پر تمام رسمی کارروائیوں کو مکمل کرنے کے بعد لاشوں کو اہل خانہ اور ضلع انتظامیہ کے حوالے کر دیا گیا۔
ونے کمار کے اہل خانہ ان کی لاش لینے ایئرپورٹ پہنچے۔ ضروری طریقہ کار مکمل کرنے کے بعد حکام نے لاش کو حکومت کی طرف سے فراہم کردہ خصوصی گاڑی میں اس کے آبائی گاو¿ں روانہ کیا۔ اس دوران روی شنکر کا خاندان چنئی ایئرپورٹ تک نہیں پہنچ سکا۔ اس لیے ضلع انتظامیہ نے ان کی لاش کو اپنی تحویل میں لے لیا اور اسے سرکاری گاڑی میں ترووناملائی بھیجنے کا انتظام کیا۔ ایم ایل اے ونود کنن نے دونوں مرنے والوں کو خراج عقیدت پیش کیا اور سوگوار خاندانوں سے تعزیت کا اظہار کیا۔
حکام کے مطابق چنئی ضلع کے اگرم کے رہنے والے سنتوش کمار اور ضلع ترووالور کے گمیڈیپونڈی کے رہنے والے بابو کی لاشیں بھی آج ممبئی سے چنئی لائی جائیں گی۔ باقی چھ مرنے والوں کی لاشیں کوئمبٹور ہوائی اڈے کے ذریعے ان کے آبائی اضلاع میں پہنچائی جائیں گی۔
ہندوستھان سماچار
ہندوستان سماچار / محمد شہزاد
