نئی دہلی، 14 جولائی (ہ س)۔ ہندوستانی ریلوے کے اہم پروجیکٹوں کی بروقت تکمیل کو یقینی بنانے کی سمت میں مرکزی حکومت نے ایک بڑا قدم اٹھاتے ہوئے ”ریل بھومی “پورٹل شروع کرنے کا اعلان کیا ہے۔ ریلوے کے وزیر اشونی ویشنو نے منگل کو کہا کہ اس ڈیجیٹل پلیٹ فارم کے نفاذ سے ریاست کی بنیاد پراراضی کے حصول کے لیے وقت کی حد میں 30 سے40 فیصد تک کمی آنے کی امید ہے، جس سے ریلوے پروجیکٹوں کو نئی رفتارملے گی۔

ویشنو نے یہاں ریلوے اصلاحات پر ایک پریس کانفرنس میں کہا کہ اب تک، زمین کے حصول کا عمل زیادہ تر کاغذی کارروائی پر مبنی رہا ہے، جس کی وجہ سے بہت سے پروجیکٹوں میں غیر ضروری تاخیر ہوتی تھی ۔ ریل بھومی پورٹل اس پورے عمل کو ڈیجیٹائز کرکے زمین کے حصول کے ہر مرحلے کی آن لائن نگرانی کرے گا۔

انہوں نے کہا کہ وزیر اعظم نریندر مودی کی قیادت میں ریلوے میں وسیع ڈھانچہ جاتی اصلاحات کی جا رہی ہیں اور ریل بھومی پورٹل ان اہم اقدامات میں سے ایک ہے جو ہندوستانی ریلوے کے پروجیکٹوں کی بروقت تکمیل اور ملک میں بنیادی ڈھانچے کی تیز رفتار ترقی کو آگے بڑھانے میں اہم کردار ادا کرے گا۔

ویشنو نے کہا کہ ریلوے نے زمین کی منتقلی کے لیے ایک واضح اور مرحلہ وار نظام نافذ کیا ہے، جس سے تنازعات کے امکانات کم ہوں گے اور پروجیکٹوں کے بروقت آغاز کو یقینی بنایا جائے گا۔ انہوں نے مزید کہا کہ ’ریل بھومی ‘پورٹل سینٹر فار ریلوے انفارمیشن سسٹم (سی آرآئی ایس ) نے تیار کیا ہے۔ یہ ویب پر مبنی پلیٹ فارم ریلوے کے مختلف ڈیجیٹل نظاموں بشمول آئی آر پی ایس ایم، آئی پی اے ایس اور ایچ آر ایم ایس کو مربوط کرے گا۔

اس سے اراضی کے حصول میں کلیدی اقدامات، محکموں کے درمیان معلومات کے تیزی سے تبادلے، ورک فلو کا موثر انتظام اور ڈیش بورڈز اور ایم آئی ایس کے ذریعے ریئل ٹائم مانیٹرنگ کا آن لائن عمل ممکن ہو سکے گا۔ ایک اندازے کے مطابق اس سے زمین کے حصول کے عمل میں 30 سے 40 فیصد تک تیزی آئے گی، پروجیکٹوں کی بہتر منصوبہ بندی ممکن ہو سکے گی اور ریلوے کے بنیادی ڈھانچے کے کاموں کی بروقت تکمیل میں مدد ملے گی۔

ریلوے حکام کا خیال ہے کہ زمین کا حصول کسی بھی ریل پروجیکٹ کا سب سے اہم اور وقت طلب مرحلہ ہوتا ہے۔ نیا ڈیجیٹل نظام نئی لائنوں، ڈبلنگ، ملٹی ٹریکنگ، فریٹ کوریڈورز اور تیز رفتار ریل جیسے پروجیکٹوں کے نفاذ میں تیزی لائے گا، جس سے وقت اور لاگت دونوں میں کمی آئے گی۔

وزارت ریلوے کا یہ اقدام ایک ایسے وقت میں آیا ہے جب کئی بڑے بنیادی ڈھانچے کے پروجیکٹ زمین کے حصول میں تاخیر کی وجہ سے رکاوٹ بنے ہوئے ہیں۔ وزارت کا خیال ہے کہ ڈیجیٹل مانیٹرنگ، آن لائن ورک فلو اور بروقت ٹریکنگ ریاستی اور ضلع انتظامیہ کے ساتھ زیادہ موثر تال میل کو قابل بنائے گی اور زیر التوا مقدمات کے حل میں تیزی لائے گی۔ تاہم زمین کے حصول کے لیے قانونی عمل متعلقہ ریاستی حکومتوں اور مجاز حکام کے ذریعے مکمل کیا جائے گا۔

ہندوستھان سماچار

ہندوستان سماچار / محمد شہزاد