نئی دہلی، 13 جولائی (ہ س)۔ مرکزی کامرس اور صنعت کے وزیر پیوش گوئل نے پیر کو ان رپورٹوں کو خارج کر دیا جس میں دعوی کیا گیا تھا کہ ہندوستان نے امریکہ کے ساتھ جلد تجارتی معاہدہ کرنے سے انکار کر دیا ہے اور اب وہ بہتر شرائط کا انتظار کر رہا ہے۔ انہوں نے کہا کہ یہ خبر سراسر جھوٹی، بے بنیاد اور گمراہ کن ہے۔

مرکزی وزیر تجارت اور صنعت نے کہا کہ ہندوستان اور امریکہ کی ٹیمیں ایک ایسے تجارتی معاہدے تک پہنچنے کے لیے پوری طرح پرعزم ہیں۔ انہوں نے بتایا کہ انہوں نے گزشتہ ماہ یہاں امریکی تجارتی نمائندے جیمسن گریر سے ملاقات کی۔ دونوں فریقوں نے ایک ایسے معاہدے کے لیے اپنی وابستگی کا اعادہ کیا جو متوازن، تجارتی اعتبار سے قابل عمل اور دونوں ممالک کے کاروباروں، کسانوں، کارکنوں اور صارفین کو ٹھوس فوائد فراہم کرے۔ انہوں نے کہا کہ جب جون میں امریکی تجارتی نمائندے جیمسن گریر نے دہلی کا دورہ کیا تو ان کے ساتھ بہت اچھی ملاقاتیں ہوئیں۔ ہماری ٹیمیں اس مقصد کے حصول کے لیے پوری طرح پرعزم ہیں۔

ہندوستان اور امریکہ کے درمیان عبوری دو طرفہ تجارتی معاہدے (بی ٹی اے) پر اہم دو روزہ وزارتی اجلاس گزشتہ ماہ نئی دہلی میں 24 جون کو منعقد ہوا تھا۔ دونوں ممالک امریکہ کے عارضی 10 فیصد ٹیرف کی 24 جولائی کو میعاد ختم ہونے سے پہلے اس معاہدے کو حتمی شکل دینے کی کوشش کر رہے ہیں، لیکن مذاکرات کے بعد جاری ہونے والے سرکاری بیان میں کسی حتمی نتیجے یا معاہدے کا اعلان نہیں کیا گیا۔

---------------

ہندوستان سماچار / عبدالسلام صدیقی