بھوپال، 13 جولائی (ہ س): مدھیہ پردیش کے وزیر اعلیٰ ڈاکٹر موہن یادو نے کہا کہ ریاست ٹیکنالوجی اور ہائی ٹیک سرمایہ کاری کا اہم مرکز بنتی جا رہی ہے۔ ملک اور بیرونِ ملک کی ممتاز کمپنیوں، سرمایہ کاروں، پالیسی سازوں اور تعلیمی اداروں کی شرکت اس بات کا اشارہ ہے کہ آنے والے برسوں میں ریاست کی ترقی کی رفتار ٹیکنالوجی اور اختراع کے سہارے نئی بلندیوں کو چھو سکتی ہے۔ اس موقع پر ریاست کی ٹیکنالوجی ترقی کے سفر پر مبنی ایک مختصر فلم بھی پیش کی گئی۔

وزیر اعلیٰ ڈاکٹر موہن یادو پیر کے روز ’ایم پی ٹیک گروتھ کانکلیو 3.0‘ کے افتتاحی پروگرام سے خطاب کر رہے تھے۔ اس موقع پر انہوں نے 178.70 کروڑ روپے کی سرمایہ کاری سے قائم 20 صنعتی اکائیوں کا افتتاح کیا، جن کے ذریعے 1,229 نئے روزگار کے مواقع پیدا ہوں گے۔

اس دوران گوگل پلے کے انڈیا لیڈ اور مدھیہ پردیش اسٹیٹ الیکٹرانکس ڈیولپمنٹ کارپوریشن (ایم پی ایس ای ڈی سی) کے درمیان ایک اہم مفاہمتی یادداشت (ایم او یو) کا تبادلہ بھی ہوا۔ اسی طرح اسپین کے شہر بارسلونا میں قائم سبمر انڈیا پرائیویٹ لمیٹڈ کے چیف ایگزیکٹو آفیسر پیٹرک سمیٹس سمیت مختلف کمپنیوں کے نمائندوں کو مدھیہ پردیش میں صنعتی یونٹ قائم کرنے کے لیے الاٹمنٹ لیٹر بھی فراہم کیے گئے۔

وزیر اعلیٰ ڈاکٹر موہن یادو نے کہا، ’’مدھیہ پردیش بھارت کی ٹیکنالوجی پر مبنی معیشت کا ایک اہم محرک بننے کے لیے تیار ہے۔ ملک اور بیرونِ ملک کی نمایاں کمپنیوں، سرمایہ کاروں، پالیسی سازوں اور تعلیمی اداروں کی شمولیت اس بات کی غماز ہے کہ آنے والے برسوں میں ریاست کی ترقی ٹیکنالوجی اور اختراع کے ذریعے نئی بلندیوں تک پہنچ سکتی ہے۔‘‘

انہوں نے کہا کہ کانکلیو کا آغاز سرمایہ کاری کو عملی شکل دینے کے واضح پیغام کے ساتھ ہوا ہے۔ اس کی سب سے بڑی کامیابی مستقبل کی سرمایہ کاری کے امکانات کے لیے ایک جامع لائحۂ عمل کی تیاری ہے۔ وزیر اعلیٰ نے بتایا کہ تین روزہ پروگرام کے دوران 51 مختلف سرگرمیوں کا انعقاد ہوگا، جن کے ذریعے ریاست میں تقریباً 40 ہزار کروڑ روپے کی سرمایہ کاری اور 35 ہزار سے زائد روزگار کے مواقع پیدا ہونے کی توقع ہے۔

انہوں نے مزید کہا کہ یہ کانکلیو مدھیہ پردیش کو عالمی صلاحیتی مراکز (جی سی سی)، ڈیٹا سینٹرز اور سیمی کنڈکٹر صنعت کا مضبوط مرکز بنانے کی سمت ایک فیصلہ کن قدم ثابت ہوگا۔ یہی وہ شعبے ہیں جو آئندہ دہائی میں عالمی معیشت کی سمت متعین کریں گے۔

ہندوستھان سماچار

---------------

ہندوستان سماچار / عبدالواحد