جموں کے بھگوتی نگر سے سخت حفاظتی حصار کے درمیان تیرتھ یاتریوں کا 12 واں قافلہ وادی کے لیے روانہ

جموں،13 جولائی (ہ س)۔

شری امرناتھ جی یاترا کے لیے عقیدت مندوں کا جوش و خروش بدستور جاری ہے اور اسی سلسلے میں پیر کی علی الصبح 7,754 یاتریوں پر مشتمل بارہواں قافلہ سخت حفاظتی انتظامات کے درمیان جموں کے بھگوتی نگر یاتری نیواس سے کشمیر کے لیے روانہ ہوا۔جوائنٹ پولیس کنٹرول روم، بھگوتی نگر بیس کیمپ کے مطابق یاتریوں کو 303 گاڑیوں کے قافلے میں بالتل اور پہلگام کے بیس کیمپ کی جانب روانہ کیا گیا۔ بالتل جانے والے قافلے میں 2,896 یاتری 133 گاڑیوں میں سوار تھے اور یہ قافلہ صبح 2 بج کر 44 منٹ پر روانہ ہوا، جبکہ پہلگام جانے والے قافلے میں 4,858 یاتری 170 گاڑیوں میں سوار تھے اور یہ قافلہ صبح 3 بج کر 28 منٹ پر اپنی منزل کی طرف روانہ کیا گیا۔

حکام کے مطابق اس قافلے میں 5,383 مرد، 2,071 خواتین، 16 بچے، 222 سادھو، 58 سادھویاں اور چار خواجہ سرا یاتری شامل ہیں۔ یاتریوں کی محفوظ نقل و حرکت کے لیے 164 بسیں، 41 درمیانی درجے کی موٹر گاڑیاں، 91 ہلکی موٹر گاڑیاں اور سات دو پہیہ گاڑیاں قافلے میں شامل کی گئیں۔

یاتریوں کے قافلے کو جموں۔سرینگر قومی شاہراہ پر مرکزی ریزرو پولیس فورس اور جموں و کشمیر پولیس کی سخت نگرانی اور حفاظتی حصار میں روانہ کیا گیا۔حکام نے بتایا کہ بارہویں کھیپ کی روانگی کے بعد یاترا کے آغاز سے اب تک بھگوتی نگر بیس کیمپ سے کشمیر کے لیے روانہ ہونے والے یاتریوں کی مجموعی تعداد 87,701 تک پہنچ گئی ہے، جو اس مقدس یاترا کے لیے عقیدت مندوں کے غیر معمولی جذبے کی عکاسی کرتی ہے۔

ہندوستھان سماچار

ہندوستان سماچار / محمد اصغر