نئی دہلی، 09 جون (ہ س)۔ دہلی اور ڈسٹرکٹ کرکٹ ایسوسی ایشن (ڈی ڈی سی اے) نے منگل کو دارالحکومت کے سب سے زیادہ باوقار اور تاریخی کرکٹ ٹورنامنٹس میں سے ایک ڈی ڈی سی اے ہاٹ ویدر ٹورنامنٹ 2026 کا باضابطہ طور پرآغاز کیا۔کئی دہائیوں سے دہلی کرکٹ کی پہچان بننے والے اس ٹورنامنٹ میں 36 کلب ٹیمیں ناک آؤٹ فارمیٹ میں ٹائٹل کے لیے مقابلہ کریں گی۔

اس سال ٹورنامنٹ کو مزید پرکشش بنانے کے لیے انعامی رقم میں 10 فیصد اضافہ کیا گیا ہے۔ اس مقابلے میں دہلی کرکٹ اور لیگ کرکٹ کے کئی نامور کھلاڑی حصہ لیں گے، جن میں آئی پی ایل کے ستارے پریانش آریہ اور ہمت سنگھ کے علاوہ دہلی ڈومیسٹک کرکٹ اور دہلی پریمیئر لیگ کے کئی کھلاڑی شامل ہیں۔

ٹورنامنٹ کا افتتاح ڈی ڈی سی اے کے صدر روہن جیٹلی نے کیا۔ اس موقع پر ڈی ڈی سی اے اپیکس کونسل کے اراکین، لیگ کمیٹی، کلب کے نمائندے اور کھلاڑی موجود تھے۔روہن جیٹلی نے کہا کہ ہاٹ ویدر ٹورنامنٹ دہلی کرکٹ کی میراث کا ایک اہم حصہ ہے اور گزشتہ برسوں میں اس مقابلے نے شہر کو بہت سے باصلاحیت کرکٹرز دیئے ہیں۔

انہوں نے کہا، ’’یہ ٹورنامنٹ دہلی کرکٹ کی تاریخ میں ایک خاص مقام رکھتا ہے۔ برسوں سے، اس مقابلے نے شہر کے بہترین ٹیلنٹ کو ایک پلیٹ فارم فراہم کیا ہے۔ کلب کرکٹ دہلی کرکٹ کی بنیاد ہے اور اس طرح کے ٹورنامنٹ اس نظام کو مضبوط کرتے ہیں۔‘‘

ڈی ڈی سی اے کے سکریٹری اشوک شرما نے کہا کہ یہ ایسوسی ایشن کا سب سے پرانا ٹورنامنٹ ہے اور انہوں نے گزشتہ تقریباً 50 برسوں سے اس کا سفر دیکھا ہے۔انہوں نے کہا،’’اس ٹورنامنٹ میں کھیلنا ہر دور سے دہلی کے ہر کرکٹر کا خواب رہا ہے۔ گوتم گمبھیر سے لے کر وریندر سہواگ سے لے کر وراٹ کوہلی تک کئی بڑے کھلاڑی اس ٹورنامنٹ میں حصہ لے چکے ہیں۔ دہلی کی گرمی میں کرکٹ کھیلنا مشکل ہے، لیکن یہی اس ٹورنامنٹ کی خاص پہچان ہے۔‘‘

درون چاریہ ایوارڈ یافتہ راجکمار شرما، جنہوں نے اپنے ابتدائی دنوں میں ہندوستانی ٹیم کے سابق کپتان وراٹ کوہلی کو تربیت دی تھی، بھی اس تقریب میں موجود تھے۔روایتی سفید لباس میں اور سرخ گیند کے ساتھ کھیلا جانے والا یہ ٹورنامنٹ کلب کرکٹ کی اصل روح کو برقرار رکھتے ہوئے کھلاڑیوں کو ہائی پریشر میچوں کا تجربہ فراہم کرتا رہے گا۔

یہ ٹورنامنٹ دہلی اور این سی آر کے مختلف میدانوں پر منعقد کیا جائے گا اور ہر میچ سڈن ڈیتھ (ناک آؤٹ) فارمیٹ میں کھیلا جائے گا۔

ان مقامات پر ٹورنامنٹ کے میچ کھیلے جائیں گے:

منڈکا کرکٹ گراؤنڈ، گھیوڑہ

چھتر سنگھ کرکٹ گراؤنڈ، جند پور

اریہنت کرکٹ اکیڈمی، چھاولا

ہریانہ کرکٹ اکیڈمی، چھاولا

ٹیلنٹ اسپورٹس گراؤنڈ، چھاولا

سٹی جم خانہ اکیڈمی، پاوی

رام جس اسپورٹس کمپلیکس، پٹیل نگر

شیواجی کالج، راجوری گارڈن

اوم کرکٹ گراؤنڈ، بختاور پور

چودھری شیام سنگھ کرکٹ گراؤنڈ، ہیرانکی

سینٹ اسٹیفن کالج، موری گیٹ

گرو گوبند سنگھ کالج، پتم پورہ

سینٹرل سکرٹریٹ گراؤنڈ، ونے مارگ

ایسیکس فارمز، چھاولا

ہندوستھا ن سماچار

ہندوستان سماچار / محمد شہزاد