ممبئی ، 5 جون (ہ س)۔ بھارتیہ جنتا پارٹی کے ریاستی ترجمان نوناتھ بان نے جمعہ کو کہا کہ کارکنوں کو اپنے ساتھ جوڑنے اور برقرار رکھنے کے لیے محبت اور اچھے تعلقات کی ضرورت ہوتی ہے۔ انہوں نے دعویٰ کیا کہ محبت اور عوامی رابطے کی اسی سیاست کی وجہ سے بڑی تعداد میں لوگ بی جے پی سے وابستہ ہوئے ہیں اور قانون ساز کونسل کی چھ نشستیں مہایوتی امیدواروں کے لیے بلا مقابلہ حاصل ہو سکی ہیں۔ انہوں نے شیو سینا (یو بی ٹی) کے رہنما سنجے راؤت کو اس حقیقت پر غور کرنے کا مشورہ دیا۔ممبئی میں بی جے پی کے ریاستی دفتر میں صحافیوں سے گفتگو کرتے ہوئے نوناتھ بان نے کہا کہ لوگوں کو اپنے ساتھ رکھنے کے لیے دولت نہیں بلکہ محبت درکار ہوتی ہے۔ ان کا کہنا تھا کہ سنجے راؤت اور ان کی جماعتی قیادت کے پاس انسانیت اور عوامی روابط کا فقدان ہے، اسی لیے نہ ان کے کارکن ان کے ساتھ رہے، نہ رہنما اور نہ ہی امیدوار۔انہوں نے کہا کہ محض پیسے کے زور پر سب کچھ حاصل نہیں کیا جا سکتا، جبکہ محبت کے ذریعے لوگوں کے دل جیتے جا سکتے ہیں۔ لوگوں کے ساتھ سخت رویہ اختیار کرنا، دروازے بند رکھنا اور ملاقات کے لیے آنے والوں کو باہر کھڑا رکھنا بی جے پی یا مہایوتی کی طرزِ سیاست نہیں ہے۔ ان کے مطابق مہایوتی عوام اور کارکنوں کے دل محبت کے ذریعے جیتتی ہے، جس کے لیے دولت کی ضرورت نہیں پڑتی۔قابلِ ذکر ہے کہ سنجے راؤت نے آج الزام عائد کیا تھا کہ حکمراں اتحاد نے تقریباً 150 کروڑ روپے خرچ کرکے قانون ساز کونسل کی چھ نشستوں کا انتخاب بلا مقابلہ کرایا ہے۔ اس پر ردعمل دیتے ہوئے نوناتھ بان نے کہا کہ بی جے پی کو کسی بھی قسم کی رقم خرچ کرنے کی ضرورت نہیں ہے۔ انہوں نے کہا کہ قانون ساز کونسل کا انتخاب عام ووٹروں کے ذریعے نہیں ہوتا بلکہ اس میں میونسپل کارپوریٹروں، ضلع پریشد اراکین اور پنچایت سمیتیوں کے صدور ووٹ دیتے ہیں۔ ان کے مطابق مہاراشٹر کی مقامی خود اختیاری اداروں کے انتخابی اعداد و شمار واضح طور پر ظاہر کرتے ہیں کہ بی جے پی کے پاس سب سے زیادہ کارپوریٹر موجود ہیں۔

نوناتھ بان نے مزید کہا کہ مہایوتی کے پاس ضلع پریشد اراکین اور پنچایت سمیتیوں کے صدور کی بھی سب سے بڑی تعداد موجود ہے، اس لیے ان اعداد و شمار کی بانیاد پر مہایوتی کی کامیابی پہلے ہی یقینی تھی۔ انہوں نے دعویٰ کیا کہ شکست کے خوف سے مہاوکاس اگھاڑی نے کئی مقامات پر اپنے امیدواروں کے نامزدگی فارم واپس لے لیے۔

انہوں نے کہا کہ بی جے پی یا مہایوتی کو کسی قسم کی خرید و فروخت کی ضرورت نہیں، کیونکہ ان کے پاس مطلوبہ عددی طاقت موجود ہے۔ اسی بانیاد پر مہایوتی قانون ساز کونسل کی تمام نشستوں پر کامیابی حاصل کرے گی۔

ہندوستھان سماچار

--------------------

ہندوستان سماچار / جاوید این اے