بیڑ، 5 جون (ہ س) ۔ سڑکوں پر خود کو سب سے بالا تر سمجھنے والے من مانی کرنے والے رکشا ڈرائیوروں اور ٹریفک قوانین کی مسلسل خلاف ورزی کرنے والے گاڑی چلانے والوں کے خلاف ٹریفک پولیس نے سخت کارروائی کرتے ہوئے مجموعی طور پر ڈیڑھ لاکھ روپے جرمانہ وصول کیا ہے۔ اطلاعات کے مطابق بعض رکشا ڈرائیوروں کی یہ عادت بن چکی تھی کہ وہ سڑک کے بیچوں بیچ رکشا کھڑی کر دیتے، کرایہ لینے سے انکار کرتے اور مسافروں کے ساتھ بحث و تکرار کرتے تھے۔ اس صورتحال کے پیش نظر پولیس نے خصوصی مہم چلاتے ہوئے ایسے ڈرائیوروں کے خلاف کارروائی کی۔پولیس نے صرف جرمانے عائد کرنے پر اکتفا نہیں کیا بلکہ موقع پر ہی ڈرائیوروں کو ٹریفک قوانین کی معلومات بھی فراہم کیں اور انہیں نظم و ضبط کی اہمیت سے آگاہ کیا۔ کارروائی کے دوران بعض افراد نے حسبِ معمول اپنے تعلقات اور شناخت استعمال کرکے بچنے کی کوشش کی، تاہم پولیس کے سخت مؤقف کے باعث کسی کی ایک نہ چل سکی۔ چند ہی گھنٹوں میں ٹریفک قوانین کی خلاف ورزی کرنے والوں سے مجموعی طور پر ایک لاکھ پچاس ہزار روپے جرمانہ وصول کرکے سرکاری خزانے میں جمع کرایا گیا۔ٹریفک پولیس حکام نے بتایا کہ بعض من مانی کرنے والے رکشا ڈرائیوروں اور بے ضابطہ گاڑی چلانے والوں کے باعث شہر میں ٹریفک جام کی شکایات مسلسل موصول ہو رہی تھیں، جس کے بعد یہ خصوصی مہم شروع کی گئی۔ انہوں نے واضح کیا کہ کارروائی کا مقصد صرف جرمانہ وصول کرنا نہیں بلکہ گاڑی چلانے والوں میں ٹریفک قوانین کے تئیں شعور اور نظم و ضبط پیدا کرنا ہے۔

ہندوستھان سماچار

--------------------

ہندوستان سماچار / جاوید این اے