کشن گنج، 4 جون (ہ س)۔ کشن گنج میں مبینہ رشوت مانگنے کا آڈیو کلپ سوشل میڈیا پر وائرل ہونے کے بعد ضلع انتظامیہ نے سخت کارروائی کرتے ہوئے ریونیو ملازم امر کمار سنگھ کو فوری اثر سے معطل کر دیا۔ اس سلسلے میں ایک حکم ضلع مجسٹریٹ اور کشن گنج کے کلکٹر وشال راج نے جاری کیا ہے۔

حکم کے مطابق وائرل آڈیو کلپ میں امر کمار سنگھ پر الزام لگایا گیا ہے کہ انہوں نے ایک درخواست گزار سے 15,000 روپے کی رشوت طلب کی ہے تاکہ میوٹیشن ماملے کو انجام دیا جائے۔

بتایا جاتا ہے کہ یہ واقعہ اس وقت پیش آیا جب وہ دیگھل بنک علاقہ میں ریونیو ملازم کے طور پر کام کر رہا تھا۔ سوشل میڈیا پر آڈیو کلپ گردش کرنے کے بعد ضلع انتظامیہ نے معاملے کو سنجیدگی سے لیتے ہوئے ابتدائی تحقیقات کر کے کارروائی کی۔

ضلع مجسٹریٹ کی طرف سے جاری حکم میں کہا گیا ہے کہ الزامات کی سنگینی کو دیکھتے ہوئے امر کمار سنگھ کو بہار گورنمنٹ سرونٹ (درجہ بندی، کنٹرول اور اپیل) رول کے تحت معطل کر دیا گیا ہے۔ اس کے خلاف محکمانہ کارروائی شروع کرنے کی بھی ہدایت کی گئی ہے۔ معطلی کی مدت کے دوران امر کمار سنگھ کے ہیڈکوارٹر کو کشن گنج سب ڈویژنل آفس کے طور پر نامزد کیا گیا ہے۔ وہ قواعد کے مطابق گزارہ الاؤنس کا حقدار ہوگا۔

انتظامیہ نے واضح کیا ہے کہ محکمانہ انکوائری کے دوران الزامات کا مکمل جائزہ لیا جائے گا۔ کوچادھامن بلاک ڈیولپمنٹ آفیسر کو ہدایت دی گئی ہے کہ وہ امر کمار سنگھ کے علاقہ کا چارج 24 گھنٹے کے اندر کسی دوسرے ریونیو اہلکار کو منتقل کریں اور ضلع انتظامیہ کو تعمیل رپورٹ فراہم کریں۔ اس کے علاوہ متعلقہ افسر کو چارج شیٹ تیار کرنے اور محکمانہ انکوائری کا عمل فوری شروع کرنے کی ہدایت کی گئی ہے۔

ضلع انتظامیہ کے اس اقدام کو بدعنوانی کے خلاف زیرو ٹالرنس پالیسی کے تحت ایک مضبوط پیغام کے طور پر دیکھا جا رہا ہے۔ اس اقدام کی انتظامی حلقوں میں بڑی چرچا ہو رہی ہے اور اسے حکومتی کاموں میں شفافیت اور جوابدہی کو یقینی بنانے کی جانب ایک اہم قدم سمجھا جا رہا ہے۔

ہندوستھان سماچار

ہندوستان سماچار / Mohammad Afzal Hassan