جموں, 04 جون (ہ س)جموں و کشمیر حکومت نے شہری علاقوں میں درختوں کے تحفظ اور ہریالی کو فروغ دینے کے لیے جموں اور سری نگر میونسپل کارپوریشنز کے تحت ٹری اتھارٹیز کی ازسرنو تشکیل کا حکم جاری کیا ہے۔سرکاری حکم نامے کے مطابق متعلقہ میونسپل کارپوریشن کے کمشنر کو ٹری اتھارٹی کا چیئرمین مقرر کیا گیا ہے، جبکہ میونسپل کارپوریشن، اربن فاریسٹری اور محکمہ باغبانی کے سینئر افسران اس کے اراکین ہوں گے۔حکم نامے میں کہا گیا ہے کہ ٹری اتھارٹیز اپنے دائرہ اختیار میں درختوں کے تحفظ کو یقینی بنائیں گی، زمین مالکان اور مکینوں سے درختوں کی تفصیلات حاصل کریں گی اور مختلف علاقوں میں درختوں کی تعداد اور اقسام سے متعلق معیارات وضع کریں گی۔اس کے علاوہ یہ اتھارٹیز سرکاری و نجی اداروں کو شجرکاری اور درختوں کے تحفظ کی سرگرمیوں میں معاونت فراہم کریں گی اور شہری علاقوں میں سبز ماحول کے فروغ کے لیے مختلف اقدامات بھی عمل میں لائیں گی۔حکومت کا کہنا ہے کہ اس اقدام کا مقصد شہری علاقوں میں ماحولیاتی توازن برقرار رکھنا اور درختوں کے تحفظ کو مزید مؤثر بنانا ہے۔

ہندوستھان سماچار

---------------

ہندوستان سماچار / محمد اصغر