ابتدائی کاروبار میں شیئر بازار میں نچلی سطح سے ریکوری کا رجحان، سینسیکس اور نفٹی سبز نشان میں پہنچے

نئی دہلی، 04 جون (ہ س)۔ گھریلو شیئر بازار میں آج ابتدائی کاروبار کے دوران نچلی سطح سے ریکوری ہوتی ہوئی نظر آ رہی ہے۔ آج کے کاروبار کی شروعات بھی کمزوری کے ساتھ ہوئی تھی۔ بازار کھلتے ہی فروخت کا دباو بڑھنے پر سینسیکس اور نفٹی دونوں انڈیکس کی کمزوری مزید بڑھ گئی۔ حالانکہ تھوڑی دیر بعد ہی خریداروں نے خریداری کا زور بنا دیا، جس سے ان دونوں انڈیکس کی چال میں سدھار ہونے لگا۔ صبح 10 بجے تک کا کاروبار ہونے کے بعد سینسیکس اور نفٹی 0.01 فیصد کی علامتی مضبوطی کے ساتھ کاروبار کر رہے تھے۔

آج 10 بجے تک کا کاروبار ہونے کے بعد شیئر بازار کے سرکردہ شیئروں میں سے اڈانی انٹرپرائزز، ایٹرنل، ٹائٹن کمپنی، ٹیک مہندرا اور اڈانی پورٹس کے شیئر 1.53 فیصد سے لے کر 0.84 فیصد کی مضبوطی کے ساتھ کاروبار کر رہے تھے۔ دوسری جانب، ٹرینٹ لمیٹڈ، ٹی ایم پی وی، آئیشر موٹرز، ہنڈالکو انڈسٹریز اور انفوسس کے شیئر 2.38 فیصد سے لے کر 1.12 فیصد کی گراوٹ کے ساتھ کاروبار کرتے ہوئے نظر آ رہے تھے۔

ابھی تک کے کاروبار میں شیئر بازار میں 2,688 شیئروں میں ایکٹیو ٹریڈنگ ہو رہی تھی۔ ان میں سے 1,696 شیئر منافع کما کر سبز نشان میں کاروبار کر رہے تھے، جبکہ 992 شیئر نقصان اٹھا کر سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 16 شیئر خریداری کی حمایت سے سبز نشان میں برقرار تھے۔ دوسری جانب 14 شیئر فروخت کے دباو میں سرخ نشان میں کاروبار کر رہے تھے۔ جبکہ نفٹی میں شامل 50 شیئروں میں سے 23 شیئر سبز نشان میں اور 27 شیئر سرخ نشان میں کاروبار کرتے نظر آ رہے تھے۔

بامبے اسٹاک ایکسچینج (بی ایس ای) کا سینسیکس 410.34 پوائنٹس کی گراوٹ کے ساتھ 73,935.83 پوائنٹس کی سطح پر کھلا۔ کاروبار کی شروعات ہوتے ہی فروخت کا دباو بڑھنے پر یہ انڈیکس گر کر 73,807.30 پوائنٹس کی سطح تک گر گیا۔ اس کے بعد خریداروں نے خریداری شروع کر دی، جس سے اس انڈیکس کی چال میں سدھار ہونے لگا۔ بازار میں مسلسل جاری خرید و فروخت کے درمیان صبح 10 بجے تک کا کاروبار ہونے کے بعد سینسیکس 8.17 پوائنٹس کی معمولی مضبوطی کے ساتھ 74,354.34 پوائنٹس کی سطح پر کاروبار کر رہا تھا۔

سینسیکس کی طرح ہی این ایس ای کے نفٹی نے آج 123.15 پوائنٹس ٹوٹ کر 23,282.45 پوائنٹس کی سطح سے کاروبار کی شروعات کی۔ بازار کھلتے ہی فروخت شروع ہو جانے کے سبب تھوڑی دیر میں ہی یہ انڈیکس گر کر 23,247.30 پوائنٹس کی سطح تک چلا گیا۔ اس کے بعد خریداروں نے خریداری شروع کر دی، جس سے اس انڈیکس کی چال میں سدھار ہونے لگا۔ بازار میں خریداروں اور فروخت کنندگان کے درمیان مسلسل جاری رسہ کشی کے درمیان صبح 10 بجے تک کا کاروبار ہونے کے بعد نفٹی 2.75 پوائنٹس کے علامتی اضافے کے ساتھ 23,408.35 پوائنٹس کی سطح پر کاروبار کر رہا تھا۔

ہندوستھان سماچار

---------------

ہندوستان سماچار / انظر حسن