ساولاکوٹ جوائنٹ ایکشن کمیٹی نے رامبن میں پرامن ریلی نکالی

جموں، 04 جون (ہ س)۔ ضلع رامبن میں 1,856 میگاواٹ کے مجوزہ ساولاکوٹ ہائیڈرو الیکٹرک پروجیکٹ کے حوالے سے منصفانہ معاوضہ، شفافیت اور مقامی حقوق کے تحفظ کے مطالبے کو لے کر رامبن میں ایک پرامن ریلی نکالی گئی۔ ریلی کا اہتمام ساولاکوٹ جوائنٹ ایکشن کمیٹی نے کیا، جس کی قیادت ایڈوکیٹ فیروز خان نے کی۔ریلی میں بڑی تعداد میں مقامی باشندوں نے شرکت کی اور اپنے مطالبات کے حق میں نعرے بازی کی۔

شرکاء نے پلے کارڈز اٹھا رکھے تھے جن پر ’ہماری زمین، ہمارے حقوق، ہمارا مستقبل‘،’رامبن کی مجبوری ہے، ساولاکوٹ ضروری ہے، ’منصفانہ معاوضہ ایکٹ کے مطابق ادائیگی کی جائے‘، ’روزگار میں رامبن کے نوجوانوں کو اولین ترجیح دی جائے‘ اور ’مقامی رضامندی کے بغیر کوئی ترقی نہیں‘ جیسے نعرے درج تھے۔ مظاہرین کا کہنا تھا کہ وہ ترقیاتی منصوبوں کے مخالف نہیں، تاہم کسی بھی بڑے پروجیکٹ کی تکمیل کے دوران متاثرہ عوام کے حقوق، زمینوں کے مناسب معاوضے اور مقامی نوجوانوں کو روزگار کی فراہمی کو یقینی بنایا جانا چاہیے۔

مقامی مبصرین کے مطابق یہ حالیہ مہینوں کے دوران علاقے میں عوامی یکجہتی کا ایک بڑا مظاہرہ تھا، جس نے زمین کے حصول اور مقامی مزدوروں کے ممکنہ نظرانداز کیے جانے سے متعلق عوامی خدشات کو نمایاں کیا۔ساولاکوٹ جوائنٹ ایکشن کمیٹی نے حکومت اور متعلقہ حکام سے مطالبہ کیا کہ منصوبے سے متاثر ہونے والے افراد کے تحفظات کو سنجیدگی سے لیا جائے اور تمام معاملات میں مکمل شفافیت اور انصاف کو یقینی بنایا جائے۔

ہندوستھان سماچار

---------------

ہندوستان سماچار / محمد اصغر