ممبئی ، 4 جون (ہ س) بھارتیہ جنتا پارٹی (بی جے پی) کے ریاستی چیف ترجمان نوناتھ بان نے جمعرات کو دعویٰ کیا کہ شیوسینا (یو بی ٹی) مہاراشٹر میں اپنا عوامی بنیاد کھو چکی ہے، اسی لیے قانون ساز کونسل کے انتخابات میں اس جماعت کا کوئی بھی رہنما ایوان تک نہیں پہنچ سکے گا۔ نوناتھ بان بی جے پی کے ریاستی صدر دفتر میں صحافیوں سے گفتگو کر رہے تھے۔ انہوں نے کہا کہ شیوسینا یو بی ٹی میں اب کارکنان باقی نہیں رہے اور پارٹی کے رہنما مسلسل بے بنیاد الزامات عائد کرتے رہتے ہیں۔ وہ شیوسینا یو بی ٹی کے رہنما سنجے راؤت کے اس بیان پر ردعمل ظاہر کر رہے تھے جس میں راؤت نے کہا تھا کہ قانون ساز کونسل کے انتخابات اب پارٹی کارکنان کے ذریعے نہیں چلائے جاتے۔

بی جے پی ترجمان نے کہا کہ سنجے راؤت کا بیان مکمل طور پر بے بنیاد ہے۔ ان کے مطابق جن جماعتوں کے پاس فعال کارکنان نہیں ہوتے وہی اس طرح کے بیانات دیتی ہیں۔ انہوں نے کہا کہ قانون ساز کونسل کے انتخابات بلدیاتی اداروں اور ضلع پریشدوں میں منتخب عوامی نمائندوں کے ووٹوں کے ذریعے منعقد ہوتے ہیں۔ نوناتھ بان کا کہنا تھا کہ زمینی سطح پر شیوسینا یو بی ٹی کے پاس کارکنان نہ ہونے کے باعث ان کے نمائندے منتخب نہیں ہو سکے، اسی لیے سنجے راؤت اپنی جماعت کی حقیقی سیاسی صورتحال چھپانے کے لیے اس قسم کے الزامات عائد کر رہے ہیں، جن کی کوئی بنیاد نہیں ہے۔

انہوں نے مزید کہا کہ مہاراشٹر قانون ساز کونسل کے انتخابات میں بی جے پی امیدواروں کو توقع سے بڑھ کر کامیابی حاصل ہونے والی ہے اور اسی وجہ سے سنجے راؤت اس نوعیت کے بیانات دے رہے ہیں۔

ہندوستھان سماچار

--------------------

ہندوستان سماچار / جاوید این اے