ممبئی ، 4 جون (ہ س) حقِ تعلیم قانون (آر ٹی ای) 2009 کے تحت نجی غیر امدادی اسکولوں میں 25 فیصد محفوظ نشستوں پر تعلیمی سال 2026-27 کے داخلہ عمل کے لیے ویٹنگ لسٹ کے دوسرے مرحلے کا آغاز 4 جون 2026 سے کر دیا گیا ہے، جو 12 جون 2026 تک جاری رہے گا۔ یہ داخلہ عمل ریاستی حکومت کے محکمۂ اسکولی تعلیم و کھیل کی ہدایات اور مہاراشٹر کے ڈائریکٹر تعلیم (ابتدائی) کی رہنمائی میں نافذ کیا جا رہا ہے۔ پہلے مرحلے کے داخلوں کی تکمیل کے بعد خالی رہ جانے والی نشستوں پر ویٹنگ لسٹ میں شامل اہل طلبہ کو داخلے کا موقع فراہم کرنے کے لیے دوسرا مرحلہ شروع کیا گیا ہے۔

اس مرحلے میں منتخب ہونے والے طلبہ کے والدین کو ہدایت دی گئی ہے کہ وہ آر ٹی ای داخلہ پورٹل پر فراہم کردہ معلومات کے مطابق مقررہ مدت کے اندر ضروری دستاویزات کے ساتھ متعلقہ اسکول پہنچ کر داخلے کا عمل مکمل کریں۔ اگر مقررہ مدت کے اندر داخلہ کی توثیق نہیں کی جاتی تو متعلقہ نشست اگلے اہل امیدوار کو دے دی جائے گی۔

والدین کو مشورہ دیا گیا ہے کہ وہ داخلہ عمل کے لیے رہائش کے ثبوت، پیدائش کا سرٹیفکیٹ، آدھار کارڈ اور حکومت کی جانب سے مقرر کردہ دیگر ضروری دستاویزات پہلے سے تیار رکھیں۔ داخلہ عمل کے دوران کسی بھی قسم کی دشواری پیش آنے کی صورت میں متعلقہ گروپ ایجوکیشن آفیسر کے دفتر، محکمۂ تعلیم یا آر ٹی ای ہیلپ ڈیسک سے رابطہ کیا جا سکتا ہے۔

اس ضمن میں ضلع پریشد تھانے کے چیف ایگزیکٹیو آفیسر رنجیت یادو نے والدین سے اپیل کرتے ہوئے کہا کہ تعلیم ہر بچے کا بنیادی حق ہے۔ آر ٹی ای داخلہ عمل کے ذریعے معیاری تعلیم کے مواقع سماج کے محروم اور کمزور طبقات تک پہنچ رہے ہیں۔ انہوں نے ویٹنگ لسٹ کے دوسرے مرحلے میں منتخب طلبہ کے والدین سے مقررہ وقت کے اندر داخلہ عمل مکمل کرنے اور اس موقع سے بھرپور فائدہ اٹھانے کی درخواست کی۔

ہندوستھان سماچار

--------------------

ہندوستان سماچار / جاوید این اے