رتناگیری، 04 جون (ہ س)۔ رتناگیری ضلع کے تعلقہ لنجہ کے بینی بدروک گاؤں کی کُسم ملے واڑی میں بدھ کی رات ایک تیندوا گھر میں گھس آیا اور 52 سالہ شخص پر حملہ کر دیا۔ اس واقعے میں مذکورہ شخص زخمی ہو گیا، جبکہ مدد کے لیے دوڑنے والا 19 سالہ نوجوان بھی تیندوے کے حملے میں زخمی ہو گیا۔ اطلاعات کے مطابق بدھ کی رات تقریباً 9:15 بجے تیندوا گھر کے پچھلے حصے سے اندر داخل ہوا۔ اچانک سامنے آنے والے تیندوے نے گھر میں موجود 52 سالہ شخص پر جھپٹا مار دیا۔ اس غیر متوقع واقعے سے گھر کے افراد میں شدید خوف و ہراس پھیل گیا اور ہر طرف افراتفری مچ گئی۔شوروغل سن کر مدد کے لیے پہنچنے والے 19 سالہ نوجوان پر بھی تیندوے نے حملہ کر دیا، جس کے نتیجے میں وہ زخمی ہو گیا۔ واقعے کی اطلاع ملتے ہی مقامی دیہاتی فوری طور پر موقع پر پہنچ گئے اور حالات کو قابو میں کرنے کی کوشش کی۔ بعد ازاں زخمیوں کو طبی امداد فراہم کر کے علاج کے لیے منتقل کیا گیا۔ اس واقعے کے بعد کُسم ملے واڑی سمیت بینی بدروک اور اطراف کے علاقوں میں خوف کا ماحول پیدا ہو گیا ہے۔ تیندوے کی بڑھتی ہوئی نقل و حرکت اور گھر میں گھس کر حملہ کرنے کے واقعے نے مقامی شہریوں کی تشویش میں اضافہ کر دیا ہے۔علاقہ مکینوں نے مطالبہ کیا ہے کہ جنگلاتی محکمہ فوری طور پر تیندوے کے بندوبست کے لیے مؤثر اقدامات کرے اور علاقے میں گشت میں اضافہ کیا جائے تاکہ شہریوں کی جان و مال کا تحفظ یقینی بنایا جا سکے۔ جنگلاتی محکمہ نے بھی شہریوں سے اپیل کی ہے کہ وہ رات کے اوقات میں خصوصی احتیاط برتیں اور غیر ضروری طور پر گھروں سے باہر نکلنے سے گریز کریں۔ہندوستھان سماچار

ہندوستان سماچار / جاوید این اے